Hum se Yahya Bin Bukair ne bayan kiya, kaha hum se Laith Bin Saad ne bayan kiya, un se Aqeel ne, un se Ibn Shihab ne, un se Salim Bin Abdullah ne ke Abdullah Bin Umar (Radi Allahu Anhuma) ne kaha ke Rasul Allah (Sallallahu Alaihi Wasallam) ne Hajjat-ul-Wida mein Tamattu kiya yani Umrah kar ke phir Haj kiya aur Aap (Sallallahu Alaihi Wasallam) Zi Al-Hulaifah se apne sath qurbani le gaye. Nabi Kareem (Sallallahu Alaihi Wasallam) ne pehle Umrah ke liye ihram bandha, phir Haj ke liye labbaik pukara. Logon ne bhi Nabi Kareem (Sallallahu Alaihi Wasallam) ke sath Tamattu kiya yani Umrah kar ke Haj kiya, lekin bohat se log apne sath qurbani ka janwar le gaye thay aur bohat se nahi le gaye thay. Jab Nabi Kareem (Sallallahu Alaihi Wasallam) Makkah tashreef laye to logon se kaha ke jo shakhs qurbani sath laya ho is ke liye Haj poora hone tak koi bhi aise cheez halal nahi ho sakti jise is ne apne oopar (ihram ki wajah se) haram kar liya hai lekin jin ke sath qurbani nahi hai to wo Bait Allah ka tawaf kar lein aur Safa aur Marwah ki sayee kar ke baal tarshwa lein aur halal ho jayein, phir Haj ke liye (az sar-e-nau athwein Zi Al-Hijjah ko ihram bandhein) aisa shakhs agar qurbani na paye to teen din ke roze Haj hi ke dinon mein aur saat din ke roze ghar wapas aa kar rakhe. Jab Nabi Kareem (Sallallahu Alaihi Wasallam) Makkah pohanche to sab se pehle Aap (Sallallahu Alaihi Wasallam) ne tawaf kiya phir Hajar-e-Aswad ko bosa diya, teen chakron mein Aap (Sallallahu Alaihi Wasallam) ne ramal kiya aur baqi chaar mein mamooli raftar se chale, phir Bait Allah ka tawaf poora kar ke Maqam-e-Ibrahim ke paas do rakat namaz parhi salam pher kar Aap (Sallallahu Alaihi Wasallam) Safa pahari ki taraf aaye aur Safa aur Marwah ki sayee bhi saat chakron mein poori ki. Jin cheezon ko (ihram ki wajah se apne par) haram kar liya tha un se is waqt tak Aap (Sallallahu Alaihi Wasallam) halal nahi hue jab tak Haj bhi poora na kar liya aur Yaum-un-Nahar (daswein Zi Al-Hijjah) mein qurbani ka janwar bhi zabah na kar liya. Phir Aap (Sallallahu Alaihi Wasallam) (Makkah wapas) aaye aur Bait Allah ka jab tawaf-e-ifazah kar liya to har wo cheez aap ke liye halal ho gayi jo ihram ki wajah se haram thi jo log apne sath hadyi le kar gaye thay unhon ne bhi isi tarah kiya jaise Rasul Allah (Sallallahu Alaihi Wasallam) ne kiya tha
.