Hum se Ishaq Bin Mansoor ne bayan kiya, unhein Nazr Bin Shumail ne khabar di, unhein Shuba ne khabar di, un se Abu Jamrah ne bayan kiya, kaha ke mein ne Ibn Abbas (Radi Allahu Anhuma) se Tamattu ke bare mein poocha to aap ne mujhe is ke karne ka hukum diya, phir mein ne qurbani ke mutaliq poocha to aap ne farmaya ke Tamattu mein ek ont, ya ek gaye ya ek bakri (ki qurbani wajib hai) ya kisi qurbani (ont, ya gaye bhains ki) mein shareek ho jaye, Abu Jamrah ne kaha ke baaz log Tamattu ko napasandida qarar dete thay. Phir mein soya to mein ne khwab mein dekha ke ek shakhs pukar raha hai ye Haj-e-Mabroor hai aur ye maqbool Tamattu hai. Ab mein Ibn Abbas (Radi Allahu Anhuma) ki khidmat mein hazir hua aur un se khwab ka zikr kiya to unhon ne farmaya: Allah-u-Akbar! Ye to Abul Qasim (Sallallahu Alaihi Wasallam) ki sunnat hai. Kaha ke Wahb Bin Jarir aur Ghundar ne Shuba ke hawala se yun naqal kiya hai «Umratun Mutaqabbalah, Wa Hajun Mabroor» (Is mein Umrah ka zikr pehle hai yani ye Umrah maqbool aur Haj mabroor hai)
.