Hum se Ishaq Bin Shahin ne bayan kiya, kaha ke hum se Khalid Tahhan ne Khalid Hazza se bayan kiya, un se Ikrima ne, un se Ibn Abbas (Radi Allahu Anhuma) ne ke Rasul Allah (Sallallahu Alaihi Wasallam) pani pilane ki jagah (Zamzam ke paas) tashreef laye aur pani manga (Haj ke moqa par) Abbas (Radi Allahu Anhu) ne kaha ke Fazl! Apni maan ke yahan ja aur un ke yahan se khajoor ka sharbat la. Lekin Rasul Allah (Sallallahu Alaihi Wasallam) ne farmaya ke mujhe (yahi) pani pilao. Abbas (Radi Allahu Anhu) ne arz kiya Ya Rasul Allah! Har shakhs apna hath is mein daal deta hai. Is ke bawajood Rasul Allah (Sallallahu Alaihi Wasallam) yahi kehte rahe ke mujhe (yahi) pani pilao. Chunancha Aap (Sallallahu Alaihi Wasallam) ne pani piya phir Zamzam ke qareeb aaye. Log kunwein se pani kheench rahe thay aur kaam kar rahe thay. Aap (Sallallahu Alaihi Wasallam) ne (unhein dekh kar) farmaya kaam karte jao ke ek achay kaam par lage hue ho. Phir farmaya (agar ye khayal na hota ke ayinda log) tumhein pareshan kar dein ge to mein bhi utarta aur rassi apne is par rakh leta. Murad Aap (Sallallahu Alaihi Wasallam) ki shana se thi. Aap (Sallallahu Alaihi Wasallam) ne is ki taraf ishara kar ke kaha tha
.