Hum se Abu Mamar ne byaan kiya , kaha ke hum se Abdul Waris ne byaan kiya , kaha ke hum se Ayub ne byaan kiya , kaha ke hum se Ikrimah ne Ibn Abbas razi Allahu anhuma se byaan kiya , Aap ne farmaya ke Rasool Allah salla Allahu alaihi wasallam jab (fatah Makka ke din) tashreef laye to Aap salla Allahu alaihi wasallam ne Kaaba ke andar jaane se is liye inkar farmaya ke is mein but rakhe hue thay . Phir Aap salla Allahu alaihi wasallam ne hukm diya aur woh nikale gaye , logon ne Ibrahim aur Ismail alaihimas-salam ke but bhi nikale . In ke haathon mein faal nikalne ke teer de rakhe thay . Rasool Allah salla Allahu alaihi wasallam ne farmaya Allah in mushrikon ko ghaarat kare , Allah ki qasam unhein acchi tarah maloom tha ke in buzurgon ne teer se faal kabhi nahi nikaali . Is ke baad Aap salla Allahu alaihi wasallam Kaaba ke andar tashreef le gaye aur chaaron taraf takbeer kahi . Aap salla Allahu alaihi wasallam ne andar namaaz nahi parhi .