Hum se Abdullah bin Abdul Wahab ne byaan kiya , kaha ke hum se Khalid bin Harith ne byaan kiya , kaha ke hum se Sufyan Thauri ne byaan kiya , kaha ke hum se Wasil Ahdab ne byaan kiya aur un se Abu Wa'il ne byaan kiya ke main Shaiba ki khidmat mein hazir hua (doosri sanad) aur hum se Qabisah ne byaan kiya , kaha ke hum se Sufyan ne Wasil se byaan kiya aur un se Abu Wa'il ne byaan kiya ke main Shaiba ke saath Kaaba mein kursi par baitha hua tha to Shaiba ne farmaya ke isi jagah baith kar Umar razi Allahu anhu ne (ek martaba) farmaya ke mera irada yeh hota hai ke Kaaba ke andar jitna sona chandi hai usay na chhoroon (jisay zamana-e-jahiliyat mein kuffar ne jama kiya tha) balke sab ko nikaal kar (musalmanon mein) taqseem kar doon . Maine arz ki ke Aap ke saathiyon (Nabi Karim salla Allahu alaihi wasallam aur Abu Bakr razi Allahu anhu) ne to aisa nahi kiya . Unhon ne farmaya ke main bhi unhein ki pairwi kar raha hoon (isi liye main is ke haath nahi lagata) .