Hum se Humaidi ne byaan kiya , unhon ne kaha ke hum se Waleed bin Muslim ne byaan kiya , unhon ne kaha ke hum se Imam Awzai ne byaan kiya , unhon ne kaha ke mujh se Zuhri ne byaan kiya , un se Abu Salamah ne byaan kiya aur un se Abu Hurairah razi Allahu anhu ne byaan kiya ke gyarahvin ki subah ko jab Nabi Karim salla Allahu alaihi wasallam Mina mein thay to yeh farmaya tha ke kal hum Khaif-e-Bani Kinana mein qiyam kareinge jahan Quraish ne kufr ki hamayat ki qasam khayi thi . Aap salla Allahu alaihi wasallam ki muraad Muhassab se thi kyunke yahin Quraish aur Kinana ne Banu Hashim aur Banu Abdul Muttalib ya (rawi ne) Banu-ul-Muttalib (kaha) ke khilaf half uthaya tha ke jab tak woh Nabi Karim salla Allahu alaihi wasallam ko in ke hawala na kar dein , in ke yahan shaadi biyah na kareinge aur na in se khareed o farokht kareinge . Aur Salamah bin Rooh ne Aqeel aur Yahya bin Dahhak se riwayat kiya , un se Imam Awzai ne byaan kiya ke mujhe Ibn Shihab ne khabar di , unhon ne (apni riwayat mein) Banu Hashim aur Banu-ul-Muttalib kaha . Abu Abdullah (Imam Bukhari rahmatullah alaihi) ne kaha ke Banu-ul-Muttalib zyada sahih hai .