Masjid-ul-Haram mein sab log barabar hain yani khaas masjid mein kyunke Allah Ta'ala ne (Surah Al-Hajj) mein farmaya , jin logon ne kufr kiya aur jo log Allah ki raah aur Masjid-ul-Haram se logon ko rokte hain ke jis ko Hum ne tamam logon ke liye yaksaan muqarrar kiya hai . Khwah woh wahin ke rehne wale hon ya bahar se aane wale aur jo shakhs wahan shararat ke saath had se tajawuz kare , Hum usay dard naak azaab ka maza chakhayeinge . Abu Abdullah (Imam Bukhari rahmatullah alaihi) ne kaha ke lafz «baadin» bahar se aane wale ke maani mein hai aur «ma'koofan» ka lafz ruke hue ke maane mein hai .

Hum se Asbagh bin Faraj ne byaan kiya , unhon ne kaha ke mujhe Abdullah bin Wahab ne khabar di , unhein Yunus ne , unhein Ibn Shihab ne , unhein Ali bin Husain ne , unhein Amru bin Uthman ne aur unhein Usama bin Zaid razi Allahu anhuma ne ke unhon ne poocha Ya Rasool Allah! Aap Makka mein kya apne ghar mein qiyam farma-yeinge . Is par Aap salla Allahu alaihi wasallam ne farmaya ke Aqeel ne hamare liye muhalla ya makaan chhora hi kab hai . (Sab baich khoch kar barabar kar diye) Aqeel aur Talib , Abu Talib ke waaris hue thay . Jafar aur Ali razi Allahu anhuma ko wirasat mein kuch nahi mila tha , kyunke yeh dono musalman ho gaye thay aur Aqeel razi Allahu anhu (ibtida mein) aur Talib Islam nahi laye thay . Isi buniyaad par Umar bin Khattab razi Allahu anhu farmaya karte thay ke musalman kafir ka waaris nahi hota . Ibn Shihab ne kaha ke log Allah Ta'ala ke is irshad se daleel lete hain ke ”Jo log imaan laye , hijrat ki aur apne maal aur jaan ke saath Allah ki raah mein jihad kiya aur woh log jinhon ne panah di aur madad ki , wahi ek doosre ke waaris honge .“