Aur Abdullah bin Abbas razi Allahu anhuma ne kaha ke Ambar ko rikaz nahi keh sakte . Ambar to ek cheez hai jisay samundar kinare par phenk deta hai .

Aur Imam Hasan Basri rahmatullah alaihi ne kaha Ambar aur moti mein paanchwan hissa lazim hai . Halanke Nabi Karim salla Allahu alaihi wasallam ne rikaz mein paanchwan hissa muqarrar farmaya hai . To rikaz us ko nahi kehte jo paani mein mile .

Aur Layth ne kaha ke mujh se Jafar bin Rabiah ne byaan kiya ‘ unhon ne Abdul Rahman bin Hurmuz se ‘ unhon ne Abu Hurairah razi Allahu anhu se ‘ unhon ne Nabi Karim salla Allahu alaihi wasallam se ke Bani Israel mein ek shakhs tha jis ne doosre Bani Israel ke shakhs se hazar ashrafiyan qarz maangi . Us ne Allah ke bharose par us ko de dein . Ab jis ne qarz liya tha woh samundar par gaya ke sawar ho jaye aur qarz-khwah ka qarz ada kare lekin sawari na mili . Aakhir us ne qarz-khwah tak puhanchne se na-umeed ho kar ek lakri li us ko kareeda aur hazar ashrafiyan is mein bhar kar woh lakri samundar mein phenk di . Ittifaq se qarz-khwah kaam-kaaj ko bahar nikla ‘ samundar par puhancha to ek lakri dekhi aur us ko ghar mein jalane ke khayal se le aaya . Phir poori hadees byaan ki . Jab lakri ko cheera to is mein ashrafiyan paayin .