Hum se Muhammad bin Ghurair Zuhri ne byaan kiya ‘ kaha ke hum se Yaqub bin Ibrahim ne apne baap se byaan kiya ‘ un se Salih bin Kaisan ne un se Ibn Shihab ne ‘ unhon ne kaha ke mujhe Aamir bin Saad bin Abi Waqqas ne apne baap Saad bin Abi Waqqas se khabar di . Unhon ne byaan kiya ke Rasool Allah salla Allahu alaihi wasallam ne chand ashkhash ko kuch maal diya . Isi jagah main bhi baitha hua tha . Unhon ne kaha ke Rasool Allah salla Allahu alaihi wasallam ne in ke saath hi baithe hue shakhs ko chhor diya aur unhein kuch nahi diya . Halanke in logon mein wahi mujhe zyada pasand tha . Aakhir maine Rasool Allah salla Allahu alaihi wasallam ke qareeb ja kar chupke se arz kiya ‘ falan shakhs ko Aap ne kuch bhi nahi diya ? Wallah main usay momin khayal karta hoon . Rasool Allah salla Allahu alaihi wasallam ne farmaya ‘ ya musalman ? Unhon ne byaan kiya ke is par main thori der tak khamosh raha . Lekin main in ke mutalliq jo kuch jaanta tha us ne mujhe majboor kiya ‘ aur maine arz kiya ‘ Ya Rasool Allah! Aap falan shakhs se kyun khafa hain ‘ Wallah! Main usay momin samajhta hoon . Aap salla Allahu alaihi wasallam ne farmaya ‘ ya musalman ? Teen martaba aisa hi hua . Aap salla Allahu alaihi wasallam ne farmaya ke ek shakhs ko deta hoon (aur doosre ko nazar-andaz kar jata hoon) halanke woh doosra meri nazar mein pehle se zyada pyara hota hai . Kyunke (jis ko main deta hoon na dene ki soorat mein) mujhe darr is baat ka rehta hai ke kahin usay chehre ke bal ghaseet kar Jahannam mein na daal diya jaye . Aur (Yaqub bin Ibrahim) apne walid se ‘ woh Salih se ‘ woh Ismail bin Muhammad se ‘ unhon ne byaan kiya ke maine apne walid se suna ke woh yahi hadees byaan kar rahe thay . Unhon ne kaha ke phir Nabi Karim salla Allahu alaihi wasallam ne apna haath meri gardan aur mondhe ke beech mein maara . Aur farmaya . Saad! Idhar suno . Main ek shakhs ko deta hoon . Aakhir hadees tak . Abu Abdullah (Imam Bukhari rahmatullah alaihi) ne kaha ke (Quran Majeed mein lafz) «kubkibu» oundhe lita dene ke maani mein hai . Aur Surah Al-Mulk mein jo «mukibban» ka lafz hai woh «akabba» se nikla hai . «akabba» lazim hai yani oundha gira . Aur is ka mutaddi «kabba» hai . Kehte hain ke «kabbahullahu li-wajhihi» yani Allah ne usay oundhe munh gira diya . Aur «kababtuhu» yani maine us ko oundha giraya . Imam Bukhari rahmatullah alaihi ne kaha Salih bin Kaisan umr mein Zuhri se bare thay woh Abdullah bin Umar razi Allahu anhuma se mile hain .