Aur Ibn Abbas razi Allahu anhuma se manqool hai ke apni zakat mein se ghulam aazad kar sakta hai aur Hajj ke liye de sakta hai . Aur Imam Hasan Basri rahmatullah alaihi ne kaha ke agar koi zakat ke maal se apne aap ko jo ghulam ho khareed kar aazad kar de to jaiz hai . Aur mujahideen ke ikhrajat ke liye bhi zakat di jaye . Isi tarah is shakhs ko bhi zakat di ja sakti hai jis ne Hajj na kiya ho . (Taake is imdad se Hajj kar sake) phir unhon ne Surah At-Tauba ki aayat «innamas-sadaqaatu lil-fuqara-i» aakhir tak ki tilawat ki aur kaha ke (aayat mein byaan shuda tamam masarif-e-zakat mein se) jis ko bhi zakat di jaye kaafi hai . Aur Nabi Karim salla Allahu alaihi wasallam ne farmaya tha ke Khalid razi Allahu anhu ne to apni zarhein Allah Ta'ala ke raste mein waqf kar di hain . Abul As (Ziyadah Khuzai Sahabi) razi Allahu anhu se manqool hai ke Nabi Karim salla Allahu alaihi wasallam ne humein zakat ke oonton par sawar kar ke Hajj karaya .

Hum se Abul Yaman ne byaan kiya ‘ kaha ke humein Shuayb ne khabar di ‘ kaha ke hum se Abul Zinad ne Aaraj se khabar di aur un se Abu Hurairah razi Allahu anhu ne byaan kiya ke Rasool Allah salla Allahu alaihi wasallam ne zakat wasool karne ka hukm diya . Phir Aap salla Allahu alaihi wasallam se kaha gaya ke Ibn Jamil aur Khalid bin Waleed aur Abbas bin Abdul Muttalib ne zakat dene se inkar kar diya hai . Is par Nabi Karim salla Allahu alaihi wasallam ne farmaya ke Ibn Jamil yeh shukr nahi karta ke kal tak woh faqeer tha . Phir Allah ne apne Rasool ki dua ki barkat se usay maaldar bana diya . Baaqi rahe Khalid ‘ to in par tum log zulm karte ho . Unhon ne to apni zarhein Allah Ta'ala ke raste mein waqf kar rakhi hain . Aur Abbas bin Abdul Muttalib ‘ to woh Rasool Allah salla Allahu alaihi wasallam ke chacha hain . Aur in ki zakat unhi par sadqa hai . Aur itna hi aur unhein meri taraf se dena hai . Is riwayat ki mutaba'at Abul Zinad ne apne walid se ki aur Ibn Ishaq ne Abul Zinad se yeh alfaaz byaan kiye . «hiya alaihi wa-mislaha ma'aha» (sadqa ke lafz ke baghair) aur Ibn Juraij ne kaha ke mujh se Aaraj se isi tarah yeh hadees byaan ki gayi .