Hum se Muhammad ne byaan kiya ‘ kaha ke humein Abdullah ne khabar di ‘ kaha ke humein Abu Bakr bin Ayash ne khabar di aur un se Sufyan Tammar ne byaan kiya ke unhon ne Nabi Karim salla Allahu alaihi wasallam ki qabr-e-mubarak dekhi hai jo kohaan numa hai . Hum se Farwah bin Abi Al-Maghra ne byaan kiya ‘ kaha ke hum se Ali bin Mushir ne byaan kiya ‘ un se Hisham bin Urwah ne ‘ un se un ke walid ne ke Waleed bin Abdul Malik bin Marwan ke ehd-e-hukoomat mein (jab Nabi Karim salla Allahu alaihi wasallam ke hujrah-e-mubarak ki) deewar giri aur log isay (zyada oonchi) uthane lage to wahan ek qadam zahir hua . Log yeh samajh kar ghabra gaye ke yeh Nabi Karim salla Allahu alaihi wasallam ka qadam-e-mubarak hai . Koi shakhs aisa nahi tha jo qadam ko pehchan sakta . Aakhir Urwah bin Zubayr ne bataya ke nahi Allah gawah hai yeh Rasool Allah salla Allahu alaihi wasallam ka qadam nahi hai balke yeh to Umar razi Allahu anhu ka qadam hai .

Hisham apne walid se aur woh Aisha razi Allahu anha se riwayat karte hain ke Aap ne Abdullah bin Zubayr razi Allahu anhuma ko wasiyat ki thi ke mujhe Nabi Karim salla Allahu alaihi wasallam aur Aap salla Allahu alaihi wasallam ke saathiyon ke saath dafan na karna . Balke meri doosri saukanon ke saath Baqi-ul-Gharqad mein mujhe dafan karna . Main yeh nahi chahti ke un ke saath meri bhi tareef hua kare .