Hum se Ali bin Abdullah ne byaan kiya ‘ kaha ke hum se Sufyan ne byaan kiya ‘ Amr ne kaha ke main ne Jabir bin Abdullah razi Allahu anhuma se suna ‘ unhon ne kaha ke Rasool Allah salla Allahu alaihi wasallam tashreef laaye to Abdullah bin Ubayy (munafiq) ko is ki qabr mein dala ja chuka tha . Lekin Aap salla Allahu alaihi wasallam ke irshad par ise qabr se nikal liya gaya . Phir Aap salla Allahu alaihi wasallam ne ise apne ghutno par rakh kar luaab-e-dahan is ke munh mein dala aur apna kurta ise pehnaya . Ab Allah hi behtar jaanta hai . (ghaliban marne ke baad ek munafiq ke saath is ehsan ki wajah yeh thi ke) unhon ne Abbas razi Allahu anhu ko ek qamees pehnayi thi (Ghazwa-e-Badr mein jab Abbas razi Allahu anhu Musalmanon ke qaidi ban kar aaye thay) Sufyan ne byaan kiya ke Abu Haroon Musa bin Abi Isa kehte thay ke Rasool Allah salla Allahu alaihi wasallam ke istemal mein do kurtay thay . Abdullah ke larke (jo momin mukhlis thay razi Allahu anhu) ne kaha ke ya Rasool Allah! mere waalid ko Aap woh qamees pehna dijiye jo Aap salla Allahu alaihi wasallam ke jasad-e-athar ke qareeb rehti hai . Sufyan ne kaha log samajhte hain ke Nabi Karim salla Allahu alaihi wasallam ne apna kurta is ke kurtay ke badal pehna diya jo us ne Abbas razi Allahu anhu ko pehnaya tha .