Allah Ta’ala ne farmaaya“Aye imaan waalo! Jab tum Namaz ke liye khade ho jaao to (pehle Wuzu karte huwe) apne chehron ko aur apne haathon ko kohniyon tak dho lo. Aur apne saron ka masah karo. Aur apne paaon takhnon tak dho lo”.

Imam Bukhari Rahimahullah kehte hain ke Nabi Kareem Sallallahu Alaihi Wasallam ne farmaaya ke Wuzu mein (aazaa ka dhoona) ek ek martaba farz hai aur Aap Sallallahu Alaihi Wasallam ne (aazaa) do do baar (dho kar bhi) Wuzu kiya hai aur teen teen baar bhi. Haan teen martaba se ziyada nahi kiya aur ulama ne Wuzu mein israaf (paani hadd se zaaid iste’maal karne) ko Makrooh kaha hai ke log Rasoolullah Sallallahu Alaihi Wasallam ke fe’l se aage badh jaayen.

Hum se Ishaq bin Ibrahim Al-Hanzali ne bayan kiya. Unhein Abdur Razzaq ne khabar di, unhein Ma’mar ne Hammam bin Munabbih ke waaste se batlaaya ke unhon ne Abu Hurairah Radhiallahu Anhu se suna, woh keh rahe the ke Rasoolullah Sallallahu Alaihi Wasallam ne farmaaya ke jo shakhs hadas kare us ki Namaz qabool nahi hoti jab tak ke woh (dobarah) Wuzu na kar le. Hazramaut ke ek shakhs ne poocha ke hadas hona kiya hai? Aap ne farmaaya ke (paakhana ke maqam se nikalne waali) aawaaz waali ya be-aawaz waali hawa.