Hum se Ismail bin Abi Uwais ne byaan kiya , kaha ke mujh se Imam Malik ne byaan kiya , un se Hisham ne , un se un ke baap Urwah bin Zubayr ne aur un se Nabi Karim salla Allahu alaihi wasallam ki zauja mutahira Aisha Siddiqa razi Allahu anha ne byaan kiya ke Rasool Allah salla Allahu alaihi wasallam bimar thay . Is liye Aap salla Allahu alaihi wasallam ne ghar hi mein baith kar namaaz parhi logon ne Aap salla Allahu alaihi wasallam ke peeche kharay ho kar namaaz parhi . Lekin Aap salla Allahu alaihi wasallam ne unhein baithne ka ishaara kiya aur namaaz ke baad farmaya ke Imam is liye hai ke us ki pairwi ki jaye . Is liye jab woh ruku kare to tum bhi ruku karo aur jab sar uthaye to tum bhi sar uthao .