Aur Abdullah bin Abbas razi Allahu anhuma ne farmaya ke namaaz mein aadmi apne jism ke jis hisse se bhi chahe , madad le sakta hai . Abu Ishaq ne apni topi namaaz parhte huay rakkhi aur uthayi . Aur Ali razi Allahu anhu apni hatheli bayein pahunche par rakhte albatta agar khujlana ya kapra durust karna hota (to kar lete thay) .

Hum se Abdullah bin Yusuf Tanisi ne byaan kiya , unhein Imam Malik rahimahullah ne khabar di , unhein Makhramah bin Sulayman ne khabar di , unhein Ibn Abbas ke ghulam Kurayb ne Abdullah bin Abbas razi Allahu anhuma se khabar di ke Aap ek raat Umm al-Mumineen Maymoonah razi Allahu anha ke yahan soye . Umm al-Mumineen Maymoonah razi Allahu anha Aap ki khala thin . Aap ne byaan kiya ke mein bistar ke arz mein lait gaya aur Rasool Allah salla Allahu alaihi wasallam aur Aap ki biwi is ke toul mein layte . Phir Rasool Allah salla Allahu alaihi wasallam so gaye hatta ke aadhi raat hui ya is se thori der pehle ya baad . To Aap salla Allahu alaihi wasallam bedaar ho kar baith gaye aur chehre se neend ke khumar ko apne donon haathon se door karne lage . Phir Surah Aal-e-Imran ke aakhir ki das aayatein parhein is ke baad paani ki ek mushk ke paas gaye jo latak rahi thi , is se Aap salla Allahu alaihi wasallam ne achhi tarah wuzu kiya , phir kharay ho kar namaaz shuru ki . Abdullah bin Abbas razi Allahu anhuma ne kaha ke mein bhi utha aur jis tarah Nabi Karim salla Allahu alaihi wasallam ne kiya tha mein ne bhi kiya aur phir ja kar Aap salla Allahu alaihi wasallam ke pehlu mein khara ho gaya to Nabi Karim salla Allahu alaihi wasallam ne apna dahina haath mere sar par rakkha aur mere dahine kaan ko pakar kar ise apne haath se marorne lage . Phir Aap salla Allahu alaihi wasallam ne do rakat namaaz parhi , phir do rakat parhi , phir do rakat parhi , phir do rakat parhi , phir do rakat parhi , phir do rakat parhi . Is ke baad (ek rakat) witr parha aur lait gaye . Jab muazzin aaya to Aap salla Allahu alaihi wasallam dobara uthe aur do halki rakatain parh kar bahar namaaz (Fajr) ke liye tashreef le gaye .

Hum se Abdullah bin Numayr ne byaan kiya , kaha ke hum se Muhammad bin Fudayl ne byaan kiya , kaha ke hum se Amash ne byaan kiya , un se Ibrahim ne , un se Alqamah ne aur un se Abdullah bin Masood razi Allahu anhu ne byaan kiya ke (pehle) Nabi Karim salla Allahu alaihi wasallam namaaz parhte hote aur hum salam karte to Aap salla Allahu alaihi wasallam is ka jawab dete thay . Jab hum Najashi ke yahan se wapas huay to hum ne (pehle ki tarah namaaz hi mein) salam kiya . Lekin is waqt Aap salla Allahu alaihi wasallam ne jawab nahin diya balkay namaaz se farigh ho kar farmaya ke namaaz mein aadmi ko fursat kahan .

Hum se Muhammad bin Abdullah bin Numayr ne byaan kiya , kaha ke hum se Ishaq bin Mansoor ne byaan kiya , un se Huraym bin Sufyan ne byaan kiya , un se Amash ne , un se Ibrahim Nakhai ne , un se Alqamah ne aur un se Abdullah bin Masood razi Allahu anhu ne Nabi Karim salla Allahu alaihi wasallam ke hawala se phir aisi hi riwayat byaan ki .

Hum se Ibrahim bin Musa ne byaan kiya , unhon ne kaha hum ko Isa bin Yunus ne khabar di , unhein Ismail bin Abi Khalid ne , unhein Harith bin Shubayl ne , unhein Abu Amr bin Saad bin Abi Iyas Shaybani ne bataya ke mujh se Zayd bin Arqam razi Allahu anhu ne batlaya ke hum Nabi Karim salla Allahu alaihi wasallam ke ehad mein namaaz parhne mein baatein kar liya karte thay . Koi bhi apne qareeb ke namazi se apni zaroorat byaan kar deta . Phir aayat «haafizoo alas-salawaat...» utri aur humein (namaaz mein) khamosh rehne ka hukm hua .

Hum se Abdullah bin Maslamah al-Qanabi ne byaan kiya , kaha ke hum se Abdul Aziz bin Abi Hazim ne byaan kiya , un se un ke baap Abu Hazim Salamah bin Dinar ne aur un se Sahl bin Saad razi Allahu anhu ne ke Nabi Karim salla Allahu alaihi wasallam Banu Amr bin Awf (Quba) ke logon mein sulah karwane tashreef laaye , aur jab namaaz ka waqt ho gaya to Bilal razi Allahu anhu ne Abu Bakr Siddiq razi Allahu anhu se kaha ke Nabi Karim salla Allahu alaihi wasallam to ab tak nahin tashreef laaye is liye ab Aap namaaz parhaiye . Unhon ne farmaya achha agar tumhari khwahish hai to main parha deta hoon . Khair Bilal razi Allahu anhu ne takbir kahi . Abu Bakr razi Allahu anhu aage barhay aur namaaz shuru ki . Itne mein Nabi Karim salla Allahu alaihi wasallam tashreef le aaye aur Aap salla Allahu alaihi wasallam saffon se guzarte huay pehli saff tak pahunch gaye . Logon ne haath par haath maarna shuru kiya . (Sahl ne) kaha ke jaante ho «tasfeeh» kya hai yani taliyan bajana aur Abu Bakr razi Allahu anhu namaaz mein kisi taraf bhi dhyan nahin kiya karte thay , lekin jab logon ne zyada taliyan bajayin to Aap mutawajja huay . Kya dekhte hain ke Nabi Karim salla Allahu alaihi wasallam saff mein maujood hain . Nabi Karim salla Allahu alaihi wasallam ne ishaara se unhein apni jagah rehne ke liye kaha . Is par Abu Bakr razi Allahu anhu ne haath utha kar Allah ka shukr kiya aur ulte paon peeche aa gaye aur Nabi Karim salla Allahu alaihi wasallam aage barh gaye .

Hum se Amr bin Isa ne byaan kiya , unhon ne kaha ke hum se Abu Abdus Samad al-Ammi Abdul Aziz bin Abdus Samad ne byaan kiya , unhon ne kaha hum se Husayn bin Abdur Rahman ne byaan kiya , un se Abu Wail ne byaan kiya , un se Abdullah bin Masood razi Allahu anhu ne byaan kiya ke hum pehle namaaz mein yoon kaha karte thay falan par salam aur naam lete thay . Aur aapas mein ek shakhs doosre ko salam kar leta . Nabi Karim salla Allahu alaihi wasallam ne sun kar farmaya is tarah kaha karo . «at-tahiyatu lillahi was-salawatu wat-tayyibatu , as-salamu alaika ayyuhan-nabiyyu wa rahmatullahi wa barakatuhu , as-salamu alaina wa ala ibadillahis-salihin , ash-hadu alla ilaha illallahu wa ash-hadu anna muhammadan abduhu wa rasooluhu» ”yani saari tahiyat , bandagiyan aur koshishein aur achhi baatein khaas Allah hi ke liye hain aur ae Nabi! Aap par salam ho , Allah ki rahmatein aur us ki barkatein nazil hon . Hum par salam ho aur Allah ke sab nek bandon par , main gawahi deta hoon ke Allah ke siwa koi mabood nahin aur gawahi deta hoon ke Muhammad salla Allahu alaihi wasallam us ke bande aur Rasool hain .“ Agar tum ne yeh parh liya to goya Allah ke in tamam salih bandon par salam pahuncha diya jo aasman aur zameen mein hain .

Hum se Ali bin Abdullah Madini ne byaan kiya , kaha ke hum se Sufyan bin Uyaynah ne byaan kiya , kaha ke hum se Zuhri ne byaan kiya , un se Abu Salamah ne aur un se Abu Hurairah razi Allahu anhu ne ke Nabi Karim salla Allahu alaihi wasallam ne farmaya , (namaaz mein agar koi baat pesh aa jaye to) mardon ko Subhan Allah kehna aur auraton ko haath par haath maarna chahiye . (yani tali baja kar Imam ko itla deni chahiye . (note: tali seedhe haathon se nahin balkay seedhe haath ko ulte haath par maar kar) .

Hum se Yahya Balkhi ne byaan kiya , kaha ke hum ko Wakee ne khabar di , unhein Sufyan Thauri ne , unhein Abu Hazim Salamah bin Dinar ne aur unhein Sahl bin Saad razi Allahu anhu ne ke Nabi Karim salla Allahu alaihi wasallam ne farmaya , Subhan Allah kehna mardon ke liye hai aur auraton ke liye tali bajana .

Sahl bin Saad razi Allahu anhu ne yeh Nabi Karim salla Allahu alaihi wasallam se naqal kiya hai .