Aur Muhammad bin Ka'ab Qurazi ne kaha ke «jaz-a» is ko kehte hain ke buri baat munh se nikalna aur Parvardigar se bad-gumani karna ‘ aur Yaqub alaihis salam ne kaha tha «innama ashku bassi wa huzni ilallah» main to is be-qarari aur ranj ka shikwa Allah hi se karta hoon . (Surah Yusuf)

Hum se Bishr bin Hakam ne byaan kiya ‘ kaha ke hum se Sufyan bin Uyaynah ne byaan kiya ‘ kaha ke hum se Ishaq bin Abdullah bin Abi Talhah ne byaan kiya ‘ ke unhon ne Anas bin Malik razi Allahu anhu se suna ‘ Aap ne batlaya ke Abu Talha razi Allahu anhu ka ek bacha bimar ho gaya unhon ne kaha ke is ka intiqal bhi ho gaya . Is waqt Abu Talha razi Allahu anhu ghar mein maujood na thay . Un ki biwi (Umm Sulaym razi Allahu anha) ne jab dekha ke bache ka intiqal ho gaya to unhon ne kuch khana tayyar kiya aur bache ko ghar ke ek kone mein lita diya . Jab Abu Talha razi Allahu anhu tashreef laaye to unhon ne poocha ke bache ki tabiyat kaisi hai ? Umm Sulaym razi Allahu anha ne kaha ke ise aaram mil gaya hai aur mera khayal hai ke ab woh aaram hi kar raha ho ga . Abu Talha razi Allahu anhu ne samjha ke woh sahih keh rahi hain . (ab bacha achha hai) phir Abu Talha razi Allahu anhu ne Umm Sulaym razi Allahu anha ke paas raat guzari aur jab subah hui to ghusl kiya lekin jab bahar jaane ka irada kiya to biwi (Umm Sulaym razi Allahu anha) ne itla di ke bache ka intiqal ho chuka hai . Phir unhon ne Nabi Karim salla Allahu alaihi wasallam ke saath namaaz parhi aur Aap se Umm Sulaym razi Allahu anha ka haal byaan kiya . Is par Rasool Allah salla Allahu alaihi wasallam ne farmaya ke shayad Allah Ta'ala tum donon ko is raat mein barkat ata farmaye ga . Sufyan bin Uyaynah ne byaan kiya ke Ansar ke ek shakhs ne bataya ke main ne Abu Talha razi Allahu anhu ki unhein biwi se nau bete dekhe jo sab ke sab Quran ke aalim thay .