Chunanche Rasoolullah Sallallahu Alaihi Wasallam ka irshaad hai «أَلَا وَقَوْلُ الزُّورِ» is ko teen baar dohraate rahe aur Ibn-e-Umar Radhiallahu Anhuma ne farmaaya ke Nabi Kareem Sallallahu Alaihi Wasallam ne farmaaya ke main ne tum ko pahuncha diya (yeh jumla) Aap Sallallahu Alaihi Wasallam ne teen martaba dohraaya.

Hum se Abdah ne bayan kiya, un se Abdus Samad ne, un se Abdullah bin Muthanna ne, un se Thumama bin Abdullah bin Anas ne, un se Anas Radhiallahu Anhu ne bayan kiya, woh Nabi-e-Akram Sallallahu Alaihi Wasallam se riwayat karte hain ke jab Aap Sallallahu Alaihi Wasallam salaam karte to teen baar salaam karte aur jab koi Kalimah irshaad farmaate to use teen baar dohraate yahan tak ke khoob samajh liya jaata.

Hum se Abdah ne bayan kiya, un se Abdus Samad ne, un se Abdullah bin Muthanna ne, un se Thumama bin Abdullah bin Anas ne, unhon ne Anas bin Malik Radhiallahu Anhu se bayan kiya, woh Rasoolullah Sallallahu Alaihi Wasallam se riwayat karte hain ke jab Aap Sallallahu Alaihi Wasallam koi Kalimah irshaad farmaate to use teen baar lautaate yahan tak ke khoob samajh liya jaata. Aur jab kuch logon ke paas Aap Sallallahu Alaihi Wasallam tashreef laate aur unhein salaam karte to teen baar salaam karte.

Hum se Musaddad ne bayan kiya, un se Abu ’Awaanah ne Abi Bishr ke waaste se bayan kiya, woh Yousuf bin Maahak se bayan karte hain, woh Abdullah bin ’Amr Radhiallahu Anhuma se, woh kehte hain ke ek safar mein Rasoolullah Sallallahu Alaihi Wasallam hum se peeche reh gaye. Phir Aap Sallallahu Alaihi Wasallam hamaare qareeb pahunche. To Asr ki Namaz ka waqt ho chuka tha ya tang ho gaya tha aur hum wuzu kar rahe the. Hum apne pairon par paani ka haath pherne lage to Aap Sallallahu Alaihi Wasallam ne baland aawaaz se farmaaya ke aag ke azaab se in aydiyon ki (jo khushk reh jaayen) kharabi hai. Yeh do martaba farmaaya ya teen martaba.