Hum se Ishaaq bin Nasr ne byaan kiya , unhon ne kaha ke hamein Abdur Razzaq bin Humam ne khabar di unhon ne kaha ke hamein Abdul Malik bin Jurayj ne khabar di unhon ne kaha ke mujh ko Amr bin Dinar ne khabar di ke Abdullah bin Abbas razi Allahu anhuma ke ghulam Abu Mabad ne unhein khabar di aur unhein Abdullah bin Abbas razi Allahu anhuma ne khabar di ke buland awaaz se zikr , farz namaaz se farigh hone par Nabi Karim salla Allahu alaihi wasallam ke zamana mubarak mein jaari tha .

Ibn Abbas razi Allahu anhuma ne farmaya ke main zikr sun kar logon ki namaaz se faraghat ko samajh jata tha .

Hum se Ali bin Abdullah Madini ne byaan kiya , unhon ne kaha ke hum se Sufyan bin Uyaynah ne byaan kiya , unhon ne kaha ke hum se Amr bin Dinar ne byaan kiya , kaha ke mujhe Abu Mabad ne Ibn Abbas razi Allahu anhuma se khabar di ke Aap ne farmaya ke main Nabi Karim salla Allahu alaihi wasallam ki namaaz khatam hone ko takbeer ( «Allahu akbar») ki wajah se samajh jata tha . Ali bin Madini ne kaha ke hum se Sufyan ne Amr ke hawale se byaan kiya ke Abu Mabad Ibn Abbas ke ghulamon mein sab se zyada qabil e itimad thay . Ali bin Madini ne batlaya ke un ka naam Nafeez tha .

Hum se Muhammad bin Abi Bakr ne byaan kiya , unhon ne kaha ke hum se Mutamir bin Sulayman ne byaan kiya , un se Ubaydullah Umari ne byaan kiya , un se Sami ne byaan kiya , un se Abu Saleh Zakwan ne byaan kiya un se Abu Hurayrah razi Allahu anhu ne farmaya ke naadar log Nabi Karim salla Allahu alaihi wasallam ki khidmat mein haazir huay aur kaha ke ameer o raees log buland darjaat aur hamesha rehne wali jannat haasil kar chuke halaanke jis tarah hum namaaz parhte hain woh bhi parhte hain aur jaise hum roze rakhte hain woh bhi rakhte hain lekin maal o daulat ki wajah se unhein hum par fauqiyat haasil hai ke us ki wajah se woh haj karte hain . Umrah karte hain . Jihad karte hain aur sadaqat dete hain (aur hum mohtaaji ki wajah se un kaamon ko nahi kar pate) is par Aap salla Allahu alaihi wasallam ne farmaya ke lo main tumhein ek aisa amal batata hoon ke agar tum is ki pabandi karoge to jo log tum se aage barh chuke hain unhein tum pa lo ge aur tumhare martabe tak phir koi nahi pohanch sake ga aur tum sab se achhe ho jao ge siwa un ke jo yahi amal shuru kar den har namaaz ke baad teentees teentees marteba tasbeeh «subhan Allah» , tahmeed «alhamdu lillah» , takbeer «Allahu akbar» kaha karo . Phir hum mein ikhtilaaf ho gaya kisi ne kaha ke hum tasbeeh «subhan Allah» teentees marteba , tahmeed «alhamdu lillah» teentees marteba aur takbeer «Allahu akbar» chontees marteba kahen ge . Main ne is par Aap salla Allahu alaihi wasallam se dobara maloom kiya to Aap salla Allahu alaihi wasallam ne farmaya ke «subhan Allah» , «alhamdu lillah» aur «Allahu akbar» kaho taanke har ek un mein se teentees marteba ho jaye .

Hum se Muhammad bin Yusuf Faryabi ne byaan kiya , unhon ne kaha ke hum se Sufyan Thauri ne Abdul Malik bin Umayr se byaan kiya , un se Mughirah bin Shubah ke katib Waraad ne , unhon ne byaan kiya ke mujh se Mughirah bin Shubah razi Allahu anhu ne Muawiyah razi Allahu anhu ko ek khatt mein likhwaya ke Nabi Karim salla Allahu alaihi wasallam har farz namaaz ke baad yeh dua parhte thay «La ilaha illa Allahu wahdahu la shareeka lahu , lahul mulku , wa lahul hamdu , wa huwa ala kulli shayin qadeer , Allahumma la mania lima atayta , wa la mutiya lima manata , wa la yanfau zal jaddi minkal jadd» Allah ke siwa koi laiq ibaadat nahi . Us ka koi shareek nahi . Badshahat us ki hai aur tamam tareef usi ke liye hai . Woh har cheez par qadir hai . Aye Allah jise tu de us se rokne wala koi nahi aur jise tu na de usay dene wala koi nahi aur kisi maldaar ko us ki daulat o maal teri bargah mein koi nafa na pohancha saken ge . Shubah ne bhi Abdul Malik se isi tarah riwayat ki hai . Hasan ne farmaya ke (hadees mein lafz) «jadd» ke maani maal daari ke hain aur Hukm , Qasim bin Mukhaymirah se woh Waraad ke wastay se isi tarah riwayat karte hain .