Aur Kuraib ne Umm Salama raziyallahu anha ke wastay se bayan kiya ke Nabi Karim salla Allahu alaihi wa sallam ne asr ke baad do rakaten parhin , phir farmaya ke Banu Abdul Qais ke wafd se guftugu ki wajah se zuhr ki do rakaten nahi parh saka tha .

Hum se Abu Naeem Fazl bin Dukain aur Moosa bin Ismail ne bayan kiya , un dono ne kaha ke hum se Hammam bin Yahya ne Qatada se bayan kiya , unhon ne Anas bin Malik raziyallahu anhu se , unhon ne Nabi Karim salla Allahu alaihi wa sallam se ke aap salla Allahu alaihi wa sallam ne farmaya agar koi namaz parhna bhool jaye to jab bhi yaad aaye is ko parh lay . Is qaza ke siwa aur koi kaffara is ki wajah se nahi hota . Aur Allah Taala ne farmaya ke namaz mere yaad aane par qaim kar . Moosa ne kaha ke hum se Hammam ne hadees bayan ki ke mein ne Qatada raziyallahu anhu se suna woh yun parhte thay namaz parh meri yaad ke liye . Hiban bin Hilal ne kaha , hum se Hammam ne bayan kiya , kaha hum se Qatada ne , kaha hum se Anas raziyallahu anhu ne , unhon ne Nabi Karim salla Allahu alaihi wa sallam se , phir aisi hi hadees bayan ki .

Hum se Musaddad bin Musarhad ne bayan kiya , kaha hum se Yahya Qattan ne bayan kiya , kaha hum se Hisham bin Urwah ne bayan kiya , kaha ke mujhe mere walid Urwah ne khabar di , kaha ke Aisha raziyallahu anha ne farmaya mere bhanje! Nabi Karim salla Allahu alaihi wa sallam ne asr ke baad ki do rakaten mere yahan kabhi tark nahi ki .

Hum se Moosa bin Ismail ne bayan kiya , kaha hum se Abdul Wahid bin Ziyad ne bayan kiya , kaha hum se Shaibani ne bayan kiya , kaha hum se Abdur Rahman bin Aswad ne bayan kiya , unhon ne apne walid se , unhon ne Aisha raziyallahu anha se ke aap ne farmaya ke do rakaton ko Rasool Allah salla Allahu alaihi wa sallam ne kabhi tark nahi farmaya , posheeda ho ya aam logon ke samne , subah ki namaz se pehle do rakaten aur asr ki namaz ke baad do rakaten .

Hum se Muhammad bin Arara ne bayan kiya , kaha hum se Shoba ne Abu Ishaq se bayan kiya , kaha ke hum ne Aswad bin Yazid aur Masrooq bin Ajda ko dekha ke unhon ne Aisha raziyallahu anha ke is kehne par gawahi di ke Nabi Karim salla Allahu alaihi wa sallam jab bhi mere ghar mein asr ke baad tashreef laye to do rakat zaroor parhte .