”Aur in ke liye dua kijiye.“ Aur jis ne apne Aap ko chhorr kar apne bhai ke liye dua ki is ki fazeelat ka bayan. Aur Abu Musa Ash'ari razi Allahu anhu ne bayan kiya ke Nabi Karim salla Allahu alaihi wasallam ne farmaya ”Ae Allah! Ubaidah Abu Aamir ki maghfirat kar, Ae Allah! Abdullah bin Qays ke gunah maaf kar.“

Hum se Musaddad ne bayan kiya, kaha hum se Yahya bin Saeed Qattan ne bayan kiya, in se Muslim ke mola Yazid bin Abi Ubaidah ne aur in se Salama bin al-Akwa razi Allahu anhu ne bayan kiya ke hum Nabi Karim salla Allahu alaihi wasallam ke saath Khaibar gaye (rasta mein) Musalmanon mein se kisi shakhs ne kaha Aamir! Apni hudi sunao. Woh hudi parhne lage aur kehne lage. Allah ki qasam! Agar Allah na hota to hum hidayat na paate“ is ke alawa doosre ashaar bhi unhon ne parhe mujhe woh yaad nahi hain. (oont hudi sun kar teiz chalne lage to) Rasool Allah salla Allahu alaihi wasallam ne farmaya ke yeh sawariyon ko kaun hanka raha hai, logon ne kaha ke Aamir bin al-Akwa hain. Nabi Karim salla Allahu alaihi wasallam ne farmaya ke Allah is par raham kare. Musalmanon mein se ek shakhs ne arz kiya: ya Rasool Allah! Kaash abhi Aap in se hamain aur faida uthane dete. Phir jab saff-bandi hui to Musalmanon ne kafiron se jang ki aur Aamir razi Allahu anhu ki talwar chhoti thi jo khud in ke paon par lag gayi aur in ki maut ho gayi. Shaam hui to logon ne jagah jagah aag jalayi. Nabi Karim salla Allahu alaihi wasallam ne daryaft farmaya ke yeh aag kaisi hai, usay kyun jalaya gaya hai? Sahabah ne kaha ke paaltu gadhon (ka gosht pakaane) ke liye Nabi Karim salla Allahu alaihi wasallam ne farmaya ke jo kuch haandiyon mein gosht hai usay phenk do aur haandiyon ko torr do. Ek sahabi ne arz kiya ke ya Rasool Allah! Ijazat ho to aisa kyun na kar lein ke haandiyon mein jo kuch hai usay phenk dein aur haandiyon ko dho lein. Nabi Karim salla Allahu alaihi wasallam ne farmaya achha yahi kar lo.

Hum se Muslim bin Ibrahim ne bayan kiya, kaha hum se Shubah ne bayan kiya, in se Amr bin Murrah ne, kaha main ne Abdullah bin Abi Aufa razi Allahu anhuma se suna ke Nabi Karim salla Allahu alaihi wasallam ki khidmat mein agar koi shakhs sadqa laata to Nabi Karim salla Allahu alaihi wasallam farmate thay ke Ae Allah! Falan ki aal-aulad par apni rahmatein nazil farma. Mere walid sadqa laaye to Nabi Karim salla Allahu alaihi wasallam ne farmaya ke Ae Allah! Abi Aufa ki aal-aulad par rahmatein nazil farma.

Hum se Ali bin Abdullah Madini ne bayan kiya, kaha hum se Sufyan bin Uyaynah ne bayan kiya, in se Ismail bin Abi Khalid ne, in se Qays ne ke main ne Jareer bin Abdullah Bajali se suna ke Rasool Allah salla Allahu alaihi wasallam ne farmaya ke koi aisa mard e mujahid hai jo mujhko Zhul-Khalasah but se aaram pahunchaye woh ek but tha jis ko jahiliyat mein log pooja karte thay aur usay Kaba kaha karte thay. Main ne kaha: ya Rasool Allah! Is khidmat ke liye main tayyar hoon lekin main ghore par theek jum kar baith nahi sakta hoon Aap ne mere seene par hath mubarak pher kar dua farmayi ke Ae Allah! Isay sabit-qadmi ata farma aur is ko hidayat karne wala aur noor e hidayat paane wala bana. Jareer ne kaha ke phir main apni qaum Ahmas ke pachaas aadmi le kar nikla aur Abi Sufyan ne yun naqal kiya ke main apni qaum ki ek jama'at le kar nikla aur main wahan gaya aur usay jala diya phir main Nabi Karim salla Allahu alaihi wasallam ke paas aaya aur main ne kaha: Ae Allah ke Rasool! Allah ki qasam! Main Aap ke paas nahi aaya jab tak main ne usay jale huay kharish-zada oont ki tarah siyah na kar diya. Pas Aap ne qabila Ahmas aur is ke ghoron ke liye dua farmayi.

Hum se Saeed bin Rabee ne bayan kiya, kaha hum se Shubah ne bayan kiya, in se Qatadah ne kaha ke main ne Anas razi Allahu anhu se suna, kaha ke Umm Sulaym razi Allahu anha ne Rasool Allah salla Allahu alaihi wasallam se kaha ke Anas Aap ka khadim hai is ke haq mein dua farmayiye. Nabi Karim salla Allahu alaihi wasallam ne dua farmayi «allaahumma aksir maalahoo wa waladahoo wa baarik lahoo feemaa aataitahoo» ”ya Allah! Is ke maal o aulad ko zyada kar aur jo kuch tu ne usay diya hai, is mein usay barkat ata farmayio.“

Hum se Usman bin Abi Shaybah ne bayan kiya, kaha hum se Abdah bin Sulayman ne bayan kiya, in se Hisham bin Urwah ne, in se un ke walid ne aur in se Aisha razi Allahu anha ne ke Rasool Allah salla Allahu alaihi wasallam ne ek sahabi ko masjid mein Quran parhte suna to farmaya Allah is par raham farmaye is ne mujhe falan falan aayitein yaad dila dien jo main falan falan suraton se bhool gaya tha.

Hum se Hafs bin Umar ne bayan kiya, kaha hum se Shubah bin Hajjaj ne, kaha mujhko Sulayman bin Mahran ne khabar di, unhein Abu Wail ne aur in se Abdullah bin Masood razi Allahu anhu ne bayan kiya ke Rasool Allah salla Allahu alaihi wasallam ne koi cheez taqseem farmayi to ek shakhs bola ke yeh aaisi taqseem hai ke is se Allah ki raza maqsud nahi hai. Main ne Nabi Karim salla Allahu alaihi wasallam ko is ki khabar di to Aap is par ghussa huay aur main ne khafgi ke aasaar Aap ke chehra mubarak par dekhe aur Aap salla Allahu alaihi wasallam ne farmaya ke Allah Musa alaihissalam par raham farmaye, unhein is se bhi zyada takleef di gayi lekin unhon ne sabr kiya.