Hum se Amr bin Hafs bin Ghiyas ne bayan kiya, kaha hum se hamare walid ne bayan kiya, kaha hum se Aamash ne bayan kiya, kaha hum se Muslim ne bayan kiya, in se Masrooq ne bayan kiya aur in se Aisha razi Allahu anha ne bayan kiya ke Nabi Karim salla Allahu alaihi wasallam ne ek kaam kiya aur logon ko bhi is ki ijazat de di lekin kuch logon ne is ka na karna achha jaana. Jab Nabi Karim salla Allahu alaihi wasallam ko is ki ittila hui to Aap ne khutba diya aur Allah ki hamd ke baad farmaya ke in logon ko kya ho gaya hai jo is kaam se parhez karte hain, jo main karta hoon, Allah ki qasam main Allah ko in sab se zyada jaanta hoon aur in sab se zyada Allah se darne wala hoon.

Hum se Abdan ne bayan kiya, kaha hum se Abdullah bin Mubarak ne, kaha hum ko Shubah ne khabar di, unhein Qatadah ne, kaha main ne Abdullah bin Utbah se suna, jo Anas razi Allahu anhu ke ghulam hain ke Abu Saeed Khudri razi Allahu anhu ne bayan kiya ke Nabi Karim salla Allahu alaihi wasallam kunwari larkiyon se bhi zyada sharmile thay, jab Aap koi aaisi cheez dekhte jo Aap ko nagowar hoti to hum Aap ke chehre mubarak se samajh jaate thay.