Hum se Ahmad bin Abi Rajaa ne bayan kiya, unhon ne kaha hum se Ishaq bin Sulayman ne bayan kiya, unhon ne kaha ke main ne Hanzalah se suna, unhon ne Nafi se bayan kiya aur unhon ne Abdullah bin Umar razi Allahu anhuma se riwayat kiya ke Rasool Allah salla Allahu alaihi wasallam ne farmaya ”mo-e zer e naaf moondna, nakhun tarshwana aur moonchh kutarwana paidaishi sunnatein hain.“

Hum se Ahmad bin Yunus ne bayan kiya, unhon ne kaha hum se Ibrahim bin Saad ne bayan kiya, unhon ne kaha hum se Ibn Shihab ne bayan kiya, in se Saeed bin al-Musayyab ne aur in se Abu Hurairah razi Allahu anhu ne ke main ne Nabi Karim salla Allahu alaihi wasallam se suna, Aap salla Allahu alaihi wasallam ne farmaya ”paanch cheezin khatna karana, zer e naaf moondna, moonchh kutarana, nakhun tarshwana aur baghal ke baal nochna paidaishi sunnatein hain.“

Hum se Muhammad bin Minhal ne bayan kiya, unhon ne kaha hum se Yazid bin Zuray ne, unhon ne kaha hum se Umar bin Muhammad bin Zayd ne bayan kiya, in se Nafi ne aur in se Abdullah bin Umar razi Allahu anhuma ne ke Nabi Karim salla Allahu alaihi wasallam ne farmaya ”tum mushrikeen ke khilaf karo, darhi chhorr do aur moonchhein kutarwao.“ Abdullah bin Umar razi Allahu anhuma jab Hajj ya Umrah karte to apni darhi (hath se) pakar laite aur (mutthi) se jo baal zyada hote unhein kutarwa dete.