Abu Abdullah Imam Bukhari rahimahullah ne kaha mujh se Abdullah bin Muhammad Musandi ne kaha ke hum se Sufyan bin Uyaynah ne Abdul Malik Ibn Juraij ke wastay se bayan kiya , unhon ne kaha ke mujh se Ibn Abi Mulaika ne kaha ke aye Abdul Malik! agar tum Ibn Abbas raziyallahu anhuma ki masajid aur un ke darwazon ko dekhte .

Hum se Abul Numan Muhammad bin Fazl aur Qutaiba bin Saeed ne bayan kiya ke hum se Hammad bin Zaid ne Ayyub Sakhtiyani ke wastay se , unhon ne Nafi se , unhon ne Abdullah bin Umar raziyallahu anhuma se ke Nabi Karim salla Allahu alaihi wa sallam jab Makka tashreef laye aur Makka fatah hua to aap ne Usman bin Talha raziyallahu anhu ko bulwaya . Jo Kaaba ke mutawalli , chabi bardar thay unhon ne darwaza khola to Nabi Karim salla Allahu alaihi wa sallam , Bilal , Usama bin Zaid aur Usman bin Talha charon andar tashreef le gaye . Phir darwaza band kar diya gaya aur wahan thori der tak thehr kar bahar aaye . Ibn Umar raziyallahu anhuma ne farmaya ke mein ne jaldi se aage barh kar Bilal se poocha ke Nabi Karim salla Allahu alaihi wa sallam ne Kaaba ke andar kya kiya unhon ne bataya ke Nabi Karim salla Allahu alaihi wa sallam ne andar namaz parhi thi . Mein ne poocha kis jagah ? kaha ke dono sutonon ke darmiyan . Abdullah bin Umar raziyallahu anhuma ne farmaya ke yeh poochna mujhe yaad na raha ke aap ne kitni rakaten parhi thin .