Aisha bint Saad apne walid (Saad bin Abi Waqqas razi Allahu anhu) se riwayat karti hain ke Nabi Karim salla Allahu alaihi wasallam ne in ke liye yun dua ki «allahummash-fi sa'dan» ke ya Allah! Saad ko tandurust kar de.

Hum se Musa bin Ismail ne bayan kiya, kaha hum se Abu Awanah ne bayan kiya, in se Mansoor ne, in se Ibrahim ne, in se Masrooq ne aur in se Aisha razi Allahu anha ne ke Rasool Allah salla Allahu alaihi wasallam jab kisi mareez ke paas tashreef le jaate ya koi mareez Aap ke paas laya jata to Aap salla Allahu alaihi wasallam yeh dua farmate «azh-hibil-ba'sa rabban-naasi, ish-fi wa antash-shaafi la shifa-a illa shifauka, shifa-al-la yughadiru saqaman» ”Ae Parvardigar logon ke! Beemari door kar de, Ae insaanon ke paalne wale! Shifa ata farma, tu hi shifa dene wala hai. Teri shifa ke siwa aur koi shifa nahi, aaisi shifa de jis mein marz bilkul baqi na rahe.“ Aur Amr bin Abi Qays aur Ibrahim bin Tahman ne Mansoor se bayan kiya, unhon ne Ibrahim aur Abu al-Duha se ke ”jab koi mareez Nabi Karim salla Allahu alaihi wasallam ke paas laya jata.“

Aur Jareer bin Abd-ul-Hameed ne Mansoor se, unhon ne Abu al-Duha akele se yun riwayat kiya ke ”Aap jab kisi beemar ke paas tashreef le jaate.“