Hum se Ibrahim bin Musa ne bayan kiya, kaha hum se Hisham bin Urwah ne bayan kiya, in se Mamar ne (doosri sanad) aur mujh se Abdullah bin Muhammad ne bayan kiya, kaha hum se Abd-ur-Razzaq ne bayan kiya, kaha hum ko Mamar ne khabar di, unhein Zuhri ne, unhein Ubaidullah bin Abdullah ne aur in se Ibn Abbas razi Allahu anhuma ne bayan kiya ke jab Rasool Allah salla Allahu alaihi wasallam ki wafat ka waqt qareeb aaya to ghar mein kai sahabah maujood thay. Umar bin Khattab razi Allahu anhu bhi wahien maujood thay. Nabi Karim salla Allahu alaihi wasallam ne farmaya ke lao main tumhare liye ek tahreer likh doon taake is ke baad tum ghalat raah par na chalo. Umar razi Allahu anhu ne is par kaha ke Nabi Karim salla Allahu alaihi wasallam is waqt sakht takleef mein hain aur tumhare paas Quran Majeed to maujood hai hi, hamare liye Allah ki kitab kafi hai. Is masle par ghar mein maujood sahabah ka ikhtilaf ho gaya aur bahas karne lage. Baaz sahabah kehte thay ke Nabi Karim salla Allahu alaihi wasallam ko (likhne ki cheezin) de do taake Nabi Karim salla Allahu alaihi wasallam aaisi tahreer likh dein jis ke baad tum gumrah na ho sako aur baaz sahabah woh kehte thay jo Umar razi Allahu anhu ne kaha tha. Jab Nabi Karim salla Allahu alaihi wasallam ke paas ikhtilaf aur bahas barh gayi to Nabi Karim salla Allahu alaihi wasallam ne farmaya ke yahan se chale jao. Ubaidullah ne bayan kiya ke Ibn Abbas razi Allahu anhuma kaha karte thay ke sab se zyada afsos yahi hai ke in ke ikhtilaf aur bahas ki wajah se Nabi Karim salla Allahu alaihi wasallam ne woh tahreer nahi likhi jo Aap Musalmanon ke liye likhna chahte thay.