Hum se Muhammad bin Yusuf ne bayan kiya , kaha hum se Sufyan ne bayan kiya , in se Aamash ne , in se Abu Wail ne aur in se Abu Masood Ansari razi Allahu anhu ne bayan kiya ke jama'at Ansar mein ek sahab thay jinhein Abu Shuaib kaha jata tha . In ke paas ek ghulam tha jo gosht bechta tha . Abu Shuaib razi Allahu anhu ne in ghulam se kaha ke tum meri taraf se khana tayyar kar do . Main chahta hoon ke Rasool Allah salla Allahu alaihi wasallam samait paanch aadmiyon ki dawat karoon . Chunanche woh Nabi Karim salla Allahu alaihi wasallam ko char doosre aadmiyon ke saath bula kar laye . In ke saath ek sahab bhi chalne lage to Nabi Karim salla Allahu alaihi wasallam ne farmaya ke hum paanch aadmiyon ki tum ne dawat ki hai magar yeh sahab bhi hamare saath aa gaye hain , agar chaho to unhein ijazat do aur agar chaho mana kar do . Abu Shuaib razi Allahu anhu ne kaha ke main ne unhein bhi ijazat de di . Muhammad bin Yusuf ne bayan kiya ke main ne Muhammad bin Ismail se suna , woh bayan karte thay ke jab log dastar-khwan par baithe hon to unhein is ki ijazat nahi hai ke ek dastar-khwan wale doosre dastar-khwan walon ko apne dastar-khwan se utha kar koi cheez dein . Albatta ek hi dastar-khwan par in ke shuraka ko is mein se koi cheez dene na dene ka ikhtiyar hai .