Hum se Ibrahim bin Musa ne byaan kiya , kaha ke hum ko Hisham bin Yusuf ne khabar di , unhein Ibn Jurayj ne khabar di , kaha ke mujhe Ata bin Abi Rabah ne khabar di kaha ke hum Ibn Abbas razi Allahu anhuma ke saath Umm al-Momineen Maymoonah razi Allahu anha ke janaza mein shareek thay . Ibn Abbas razi Allahu anhuma ne kaha ke Nabi Karim salla Allahu alaihi wasallam ki zauja mutahhara hain jab tum un ka janaza uthao to zor zor se harakat na dena balkay aahista aahista narmi ke saath janaza ko le kar chalna . Nabi Karim salla Allahu alaihi wasallam ke paas Aap ki wafat ke waqt Aap ke nikah mein nau biwiyaan thien aath ke liye to Aap ne baari muqarrar kar rakkhi thi lekin ek ki baari nahi ku .

Hum se Musaddad ne byaan kiya . Kaha hum se Yazid bin Zuray ne byaan kiya , kaha hum se Saeed ne byaan kiya , un se Qatadah ne , un se Anas razi Allahu anhu ne ke Nabi Karim salla Allahu alaihi wasallam ek martaba ek hi raat mein apni tamam biwiyon ke paas gaye Nabi Karim salla Allahu alaihi wasallam ke paas nau biwiyaan thien . Imam Bukhari rahmahullah ne kaha ke mujh se Khaleefa bin Khayyat ne byaan kiya , kaha hum se Saeed ne byaan kiya , un se Qatadah ne aur un se Anas razi Allahu anhu ne byaan kiya , unhon ne Nabi Karim salla Allahu alaihi wasallam se phir yahi hadees byaan ki .

Hum se Ali bin Hakam Ansari ne byaan kiya , kaha hum se Abu Awanah ne byaan kiya , un se Raqaba ne , un se Talha al-Yaami ne , un se Saeed bin Jubayr ne byaan kiya ke mujh se Ibn Abbas razi Allahu anhuma ne daryaft farmaya ke tum ne shadi kar li hai ? Main ne arz kiya ke nahi . Aap ne farmaya ke shadi kar lo kyunke is ummat ke behtareen shakhs jo thay (yani Nabi Karim salla Allahu alaihi wasallam) un ki bahut si biwiyaan thien . (baazon ne yun tarjuma kiya hai ke is ummat mein achhe wahi log hain jin ki bahut auratein hon) .