Is baab mein Nabi Karim salla Allahu alaihi wasallam ki ek hadees Umrah ne Aisha razi Allahu anha se naqal ki hai.

Hum se Abdullah bin Yusuf Taneesi ne byaan kiya, kaha hum ko Imam Malik ne khabar di, unhein Abdur Rahman bin Abdullah bin Abdur Rahman bin Abi Sasah ne, unhein un ke walid Abdullah ne aur unhein Abu Saeed Khudri razi Allahu anhu ne ke ek sahabi (khud Abu Saeed Khudri) ne ek doosre sahabi (Qatadah bin Numan razi Allahu anhu) apne maan jaaye bhai ko dekha ke woh raat ko Surah «qul huwallahu ahadun» baar baar parh rahe hain. Subah hui to woh sahabi (Abu Saeed razi Allahu anhu) Rasool Allah salla Allahu alaihi wasallam ki khidmat mein hazir huay aur Nabi Karim salla Allahu alaihi wasallam se is ka zikr kiya goya unhon ne samjha ke is mein koi bara sawab na ho ga. Nabi Karim salla Allahu alaihi wasallam ne farmaya ke is zaat ki qasam jis ke hath mein meri jaan hai! Yeh surat Quran Majeed ke ek tihayi hisse ke barabar hai.

Aur Abu Mamar (Abdullah bin Amr Manqari) ne itna zyada kiya ke hum se Ismail bin Jafar ne byaan kiya, un se Imam Malik bin Anas ne, un se Abdur Rahman bin Abdullah bin Abdur Rahman bin Abi Sasah ne, un se un ke walid ne aur un se Abu Saeed Khudri razi Allahu anhu ne ke mujhe mere bhai Qatadah bin Numan razi Allahu anhu ne khabar di ke ek sahabi Nabi Karim salla Allahu alaihi wasallam ke zamane mein sehri ke waqt se kharay «qul huwallahu ahadun» parhte rahe. In ke siwa aur kuch nahi parhte thay. Phir jab subah hui to doosre sahabi Nabi Karim salla Allahu alaihi wasallam ki khidmat mein hazir huay (baqi hissa) pichhli hadees ki tarah byaan kiya.

Hum se Umar bin Hafs bin Ghiyas ne byaan kiya, kaha mujh se mere walid ne byaan kiya, kaha hum se Aamash ne byaan kiya, kaha hum se Ibrahim Nakhai aur Dahhak Mashriqi ne byaan kiya aur un se Abu Saeed Khudri razi Allahu anhu ne ke Nabi Karim salla Allahu alaihi wasallam ne apne sahabah se farmaya ke kya tum mein se kisi ke liye yeh mumkin nahi ke Quran ka ek tihayi hissa ek raat mein parha kare? Sahabah ko yeh amal bara mushkil maloom hua aur unhon ne arz kiya: ya Rasool Allah! Hum mein se kaun is ki taqat rakhta hai. Nabi Karim salla Allahu alaihi wasallam ne is par farmaya ke «al-waahid-us-samadu» (yani «qul huwallahu ahadun») Quran Majeed ka ek tihayi hissa hai. Muhammad bin Yusuf Farabri ne byaan kiya ke main ne Abu Abdullah Imam Bukhari rahmahullah ke katib Abu Jafar Muhammad bin Abi Hatim se suna, woh kehte thay ke Imam Bukhari rahmahullah ne kaha Ibrahim Nakhai ki riwayat Abu Saeed Khudri razi Allahu anhu se munqata hai (Ibrahim ne Abu Saeed se nahi suna) lekin Dahhak Mashriqi ki riwayat Abu Saeed se muttasil hai.