Mujh se Abu Muhammad Bishr bin Khalid ne byaan kiya , kaha hum ko Muhammad bin Jafar ne khabar di , unhein Shubah ne , unhein Sulayman Aamash ne , unhein Abu Wail ne aur un se Abu Masood Ansari razi Allahu anhu ne byaan kiya ke jab hamain khairat karne ka hukm hua to hum mazdoori par bojh uthate (aur is ki mazdoori sadqa mein de dete) chunanche Abu Aqeel isi mazdoori se aadha sa khairat le kar aaye aur ek doosre sahabi Abdur Rahman bin Auf is se zyada laye . Is par munafiqon ne kaha ke Allah ko is (yani Aqeel) ke sadqa ki koi zaroorat nahi thi aur is doosre (Abdur Rahman bin Auf) ne to mahz dikhawe ke liye itna bahut sa sadqa diya hai . Chunanche yeh aayat nazil hui «allazhina yalmizoonal mutawwieena minal momineena fis-sadaqaati wallazhina la yajidoona illa juhdahum» ke ”yeh aise log hain jo sadaqaat ke baare mein nafal sadqa dene wale Musalmanon par tan karte hain aur khusoosan in logon par jinhein bajuz un ki mehnat mazdoori ke kuch nahi milta .“ Aakhir aayat tak .

Hum se Ishaq bin Ibrahim ne byaan kiya , kaha ke main ne Abu Usamah (Hammad bin Usamah) se poocha , Aap hazrat se Za'ida bin Qudamah ne byaan kiya tha ke un se Sulayman ne , un se Shaqeeq ne aur un se Abu Masood Ansari ne byaan kiya ke Rasool Allah salla Allahu alaihi wasallam sadqa ki targheeb dete thay to Aap salla Allahu alaihi wasallam ke baaz sahabah mazdoori kar ke laate aur (bari mushkil se) ek mudd ka sadqa kar sakte lekin aaj unhi mein baaz aise hain jin ke paas lakhon dirham hain . Ghaliban un ka isharah khud apni taraf tha (Hammad ne kaha haan sach hai) .

Hum se Ubayd bin Ismail ne byaan kiya , un se Abu Usamah ne , un se Ubaydullah bin Umari ne , un se Nafi ne aur un se Ibn Umar razi Allahu anhuma ne ke jab Abdullah bin Ubayy (munafiq) ka intiqal hua to is ke larke Abdullah bin Abdullah (jo pukhta Musalman thay) Rasool Allah salla Allahu alaihi wasallam ki khidmat mein hazir huay aur arz kiya ke Aap apni qamees un ke walid ke kafan ke liye inayat farma dein . Nabi Karim salla Allahu alaihi wasallam ne qamees inayat farmayi . Phir unhon ne arz ki ke Aap namaz e janaza bhi parha dein . Nabi Karim salla Allahu alaihi wasallam namaz e janaza parhane ke liye bhi aage barh gaye . Itne mein Umar razi Allahu anhu ne Aap salla Allahu alaihi wasallam ka daman pakar liya aur arz kiya: ya Rasool Allah! Is ki namaz e janaza parhane ja rahe hain , jabke Allah Ta'ala ne Aap ko is se mana bhi farma diya hai . Nabi Karim salla Allahu alaihi wasallam ne farmaya Allah Ta'ala ne mujhe ikhtiyar diya hai farmaya hai «istaghfir lahum au la tastaghfir lahum in tastaghfir lahum sabeena marratun» ke ”Aap un ke liye istighfar karein khwah na karein . Agar Aap un ke liye sattar baar bhi istighfar karein ge (tab bhi Allah unhein nahi bakhshe ga) .“ Is liye main sattar martaba se bhi zyada istighfar karoon ga . (mumkin hai ke Allah Ta'ala zyada istighfar karne se maaf kar de) Umar razi Allahu anhu bolay lekin yeh shakhs to munafiq hai . Ibn Umar razi Allahu anhuma ne byaan kiya ke aakhir Nabi Karim salla Allahu alaihi wasallam ne is ki namaz e janaza parhayi . Is ke baad Allah Ta'ala ne yeh hukm nazil farmaya «wa la tusalli ala ahadin minhum maata abadan wa la taqum ala qabrihi» ke ”aur in mein se jo koi mar jaye is par kabhi bhi namaz na parh-ye aur na is ki qabr par khara huiye .“