Mujh se Abdullah bin Muhammad aur Ishaq bin Nasr ne byaan kiya , kaha hum se Yahya bin Adam ne byaan kiya , kaha hum se Yahya bin Zakariya bin Abi Zaidah ne byaan kiya , un se un ke walid ne aur un se Abu Ishaq Amr bin Abdullah ne , un se Aswad bin Yazid ne aur un se Abu Musa Ash'ari razi Allahu anhu ne ke main aur mere bhai Abu Ruhm ya Abu Burdah Yaman se aaye to hum (ibtida mein) bahut dinon tak yeh samajhte rahe ke Ibn Masood razi Allahu anhu aur un ki walda Umm Abdullah razi Allahu anhuma donon Nabi Karim salla Allahu alaihi wasallam ke Ahl e Bayt mein se hain kyunke yeh Nabi Karim salla Allahu alaihi wasallam ke ghar mein raat din bahut aaya jaya karte thay aur har waqt Nabi Karim salla Allahu alaihi wasallam ke saath raha karte thay .

Aur Abu Musa Ash'ari razi Allahu anhu ne Nabi Karim salla Allahu alaihi wasallam se byaan kiya ke Ash'ari log mujh se hain aur main un mein se hoon .

Hum se Abu Naeem ne byaan kiya , kaha hum se Abdus Salam bin Harb ne byaan kiya , un se Ayub Sakhtiyani ne , un se Abu Qulabah ne aur un se Zahdam ne ke jab Abu Musa razi Allahu anhu (Kufa ke ameer ban kar Usman razi Allahu anhu ke ahad e khilafat mein) aaye to is qabila Jurm ka unhon ne bahut aazaaz kiya . Zahdam kehte hain hum Aap ki khidmat mein baithe huay thay aur woh murgh ka nashta kar rahe thay . Hazireen mein ek aur sahab bhi baithe huay thay . Abu Musa razi Allahu anhu ne unhein bhi khane par bulaya to un sahab ne kaha ke jab se main ne murghiyon ko kuch (gandi) cheezin khate dekha hai , isi waqt se mujhe is ke gosht se ghin aane lagi hai . Abu Musa razi Allahu anhu ne kaha ke aao bhai main ne Rasool Allah salla Allahu alaihi wasallam ko is ka gosht khate dekha hai . Un sahab ne kaha lekin main ne is ka gosht na khane ki qasam kha rakkhi hai . Unhon ne kaha ke tum aa to jao main tumhein tumhari qasam ke baare mein bhi ilaaj bataoon ga . Hum qabila Ash'ar ke chand log Nabi Karim salla Allahu alaihi wasallam ki khidmat mein hazir huay aur Aap se (Ghazwa Tabook ke liye) janwar maange . Aap salla Allahu alaihi wasallam ne farmaya ke sawari nahi hai . Hum ne phir Aap se maanga to Aap ne is martaba qasam khayi ke Aap hum ko sawari nahi dein ge lekin abhi kuch zyada der nahi hui thi ke ghanimat mein kuch oont aaye aur Nabi Karim salla Allahu alaihi wasallam ne in mein se paanch oont hum ko dilaye . Jab hum ne unhein le liya to phir hum ne kaha ke yeh to hum ne Nabi Karim salla Allahu alaihi wasallam ko dhoka diya . Aap ko ghaflat mein rakkha , qasam yaad nahi dilayi . Aisi halat mein hamari bhalayi kabhi nahi ho gi . Aakhir main Aap ke paas aaya aur main ne kaha: ya Rasool Allah! Aap ne to qasam kha li thi ke Aap hum ko sawari nahi dein ge phir Aap ne sawari de di . Nabi Karim salla Allahu alaihi wasallam ne farmaya ke theek hai lekin jab bhi main koi qasam khaata hoon aur is ke siwa doosri surat mujhe is se behtar nazar aati hai to main wahi karta hoon jo behtar hota hai (aur qasam ka kaffara de deta hoon) .

Mujh se Amr bin Ali ne byaan kiya , kaha hum se Abu Aasim Nabeel ne byaan kiya . Kaha hum se Sufyan Sawri ne byaan kiya , kaha hum se Abu Sakhrah Jami bin Shaddad ne byaan kiya , kaha hum se Safwan bin Muhriz Mazni ne byaan kiya , kaha hum se Imran bin Husain razi Allahu anhuma ne byaan kiya ke Banu Tamim Rasool Allah salla Allahu alaihi wasallam ki khidmat mein hazir huay to Aap salla Allahu alaihi wasallam ne farmaya ke ae Banu Tamim! Bisharat qabool karo . Unhon ne kaha ke jab Aap ne hamain bisharat di hai to kuch rupaye bhi inayat farmayein . Is par Aap salla Allahu alaihi wasallam ke chehre ka rang badal gaya . Phir Yaman ke kuch Ash'ari log aaye , Aap salla Allahu alaihi wasallam ne un se farmaya ke Banu Tamim ne bisharat qabool nahi ki , Yaman walo! Tum qabool kar lo . Woh bolay hum ne qabool ki ya Rasool Allah .

Hum se Abdullah bin Muhammad Jafi ne byaan kiya , kaha hum se Wahb bin Jareer ne byaan kiya , kaha hum se Shubah ne byaan kiya , un se Ismail bin Abi Khalid ne , un se Qays bin Abi Hazim ne aur un se Abu Masood razi Allahu anhu ne ke Nabi Karim salla Allahu alaihi wasallam ne farmaya ke iman to idhar hai aur Aap ne apne hath se Yaman ki taraf isharah kiya aur be-rahmi aur sakht dili oont ki dum ke peeche peeche chalane walon mein hai , jidhar se Shaytan ke donon seeng nikalte hain (yani Mashriq) qabila Rabiah aur Mudar ke logon mein .

Hum se Muhammad bin Bashar ne byaan kiya , kaha hum se Muhammad bin Abi Adi ne byaan kiya , un se Shubah ne , un se Sulayman ne , un se Zhakwan ne aur un se Abu Hurairah razi Allahu anhu ne ke Nabi Karim salla Allahu alaihi wasallam ne farmaya ke tumhare yahan Ahl e Yaman aa gaye hain , un ke dil ke parde bareek , dil narm hote hain , iman Yaman walon ka hai aur hikmat bhi Yaman ki achhi hai aur fakhr o takabbur oont walon mein hota hai aur itminan aur sahoolat bakri walon mein . Aur Ghundar ne byaan kiya is hadees ko Shubah se , un se Sulayman ne , unhon ne Zhakwan se suna , unhon ne Abu Hurairah razi Allahu anhu se aur unhon ne Nabi Karim salla Allahu alaihi wasallam se .

Hum se Ismail bin Abi Uways ne byaan kiya , kaha ke mujh se mere bhai Abdul Hameed ne byaan kiya , un se Ibn Bilal ne , un se Sawr bin Zayd ne , un se Abu al-Ghais (Salim) ne aur un se Abu Hurairah razi Allahu anhu ne ke Rasool Allah salla Allahu alaihi wasallam ne farmaya ke iman Yaman ka hai aur fitna (deen ki kharabi) idhar se hai aur idhar hi se Shaytan ke sar ka kona namoodar ho ga .

Hum se Abu al-Yaman ne byaan kiya , kaha hum ko Shuayb ne khabar di , kaha hum se Abu al-Zinad ne byaan kiya , un se Aaraj ne aur un se Abu Hurairah razi Allahu anhu ne byaan kiya ke Nabi Karim salla Allahu alaihi wasallam ne farmaya ke tumhare yahan Ahl e Yaman aaye hain jo narm dil raqeeq al-qalb hain , deen ki samajh Yaman walon mein hai aur hikmat bhi Yaman ki hai .

Hum se Abdan ne byaan kiya , un se Abu Hamzah Muhammad bin Maymoon ne , un se Aamash ne , un se Ibrahim Nakhai ne aur un se Alqamah ne byaan kiya ke hum Abdullah bin Masood razi Allahu anhu ke paas baithe huay thay . Itne mein Khabbab bin Aratt razi Allahu anhu mashhoor sahabi tashreef laye aur kaha: Abu Abdur Rahman! Kya yeh naujawan log (jo tumhare shagird hain) isi tarah Quran parh sakte hain jaise Aap parhte hain ? Ibn Masood razi Allahu anhu ne kaha ke agar Aap chahein to main kisi se tilawat ke liye kahoon ? Unhon ne farmaya ke zaroor . Is par Ibn Masood razi Allahu anhu ne kaha: Alqamah! Tum parho , Zayd bin Hudayr , Ziyad bin Hudayr ke bhai , bolay Aap Alqamah se tilawat e Quran ke liye farmate hain haalan ke woh hum sab se achhe qaari nahi hain . Ibn Masood razi Allahu anhu ne kaha agar tum chaho to main tumhein woh hadees suna doon jo Rasool Allah salla Allahu alaihi wasallam ne tumhari qaum ke haq mein farmayi thi . Khair Alqamah kehte hain ke main ne Surah Maryam ki pachaas aayatein parh kar sunayein . Abdullah bin Masood razi Allahu anhu ne Khabbab razi Allahu anhu se poocha kaho kaisa parhta hai ? Khabbab razi Allahu anhu ne kaha bahut khoob parha . Abdullah bin Masood razi Allahu anhu ne kaha ke jo aayat bhi main jis tarah parhta hoon Alqamah bhi isi tarah parhta hai , phir unhon ne Khabbab razi Allahu anhu ko dekha , un ke hath mein sone ki angoothi thi , to kaha: Kya abhi waqt nahi aaya hai ke yeh angoothi phenk di jaye . Khabbab razi Allahu anhu ne kaha ke aaj ke baad Aap yeh angoothi mere hath mein nahi dekhein ge . Chunanche unhon ne angoothi utaar di . Isi hadees ko Ghundar ne Shubah se riwayat kiya hai .