Mujh se Mahmood bin Ghaylan ne byaan kiya , kaha hum se Abdur Razzaq ne byaan kiya , unhein Mamar ne khabar di . (doosri sanad) aur mujh se Naeem bin Hammad ne byaan kiya , kaha hum ko Abdullah bin Mubarak ne khabar di , unhein Mamar ne , unhein Zuhri ne , unhein Salim ne aur un se un ke walid Abdullah bin Umar razi Allahu anhuma ne byaan kiya ke Nabi Karim salla Allahu alaihi wasallam ne Khalid bin Waleed razi Allahu anhu ko Bani Jazheema ki taraf bheja . Khalid bin Waleed razi Allahu anhu ne unhein Islam ki dawat di lekin unhein «aslamna» ”hum Islam laye“ kehna nahi aata tha , is ke bajaye woh «saba'na , saba'na» ”hum be-deen ho gaye , yani apne aabayi deen se hat gaye“ kehne lage . Khalid razi Allahu anhu ne unhein qatl karna aur qaid karna shuru kar diya aur phir hum mein se har shakhs ko is ka qaidi is ki hifazat ke liye de diya phir jab ek din Khalid razi Allahu anhu ne hum sab ko hukm diya ke hum apne qaidiyon ko qatl kar dein . Main ne kaha: Allah ki qasam! Main apne qaidi ko qatl nahi karoon ga aur na mere sathiyon mein koi apne qaidi ko qatl kare ga aakhir jab hum Rasool Allah salla Allahu alaihi wasallam ki khidmat mein hazir huay aur Aap se surat e haal byaan kiya to Aap ne hath utha kar dua ki . Ae Allah! Main is fail se bezari ka aalan karta hoon , jo Khalid ne kiya . Do martaba Aap salla Allahu alaihi wasallam ne yahi farmaya .