Hum se Abul Yaman ne bayan kiya ‘ kaha hum ko Shuaib ne khabar di ‘ in se Zuhri ne bayan kiya ‘ kaha ke mujhe Salim ne khabar di aur in se Ibn Umar (Radi Allahu Anhuma) ne ke mein Najd ki taraf Nabi Kareem Sallallahu Alaihi Wasallam ke sath ghazwa ke liye gaya tha. Wahan hum dushman ke aamne samne hue aur in ke muqable mein saff bandi ki
.

Hum se Musaddad ne bayan kiya ‘ kaha hum se Yazid Bin Zurai ne bayan kiya ‘ kaha hum se Ma'mar ne bayan kiya ‘ in se Zuhri ne ‘ in se Salim Bin Abdullah Bin Umar (Radi Allahu Anhuma) ne aur in se in ke walid ne ke Nabi Kareem Sallallahu Alaihi Wasallam ne ek jamaat ke sath namaz (namaz-e-khauf) parhi aur dusri jamaat is arsa mein dushman ke muqable par khari thi. Phir ye jamaat jab apne dusre sathiyon ki jagah (namaz parh kar) chali gayi to dusri jamaat aayi aur Nabi Kareem Sallallahu Alaihi Wasallam ne unhein bhi ek rakat namaz parhayi. Is ke baad Aap ne is jamaat ke sath salam phera. Aakhir is jamaat ne kharay ho kar apni ek rakat poori ki aur pehli jamaat ne bhi kharay ho kar apni ek rakat poori ki
.

Hum se Abul Yaman ne bayan kiya ‘ kaha hum se Shuaib ne bayan kiya ‘ in se Zuhri ne bayan kiya ‘ in se Sinan aur Abu Salama ne bayan kiya aur unhein Jabir Radi Allahu Anhu ne khabar di ke wo Nabi Kareem Sallallahu Alaihi Wasallam ke sath atraf-e-Najd mein larayi ke liye gaye thay
.

Hum se Ismail Bin Abi Uwais ne bayan kiya ‘ kaha ke mujh se mere bhai Abdul Hamid ne bayan kiya ‘ in se Sulaiman Bin Bilal ne ‘ in se Muhammad Bin Abi Atiq ne ‘ in se Ibn Shihab ne ‘ in se Sinan Bin Abi Sinan Douli ne ‘ unhein Jabir Radi Allahu Anhu ne khabar di ke wo Nabi Kareem Sallallahu Alaihi Wasallam ke sath atraf-e-Najd mein ghazwa ke liye gaye thay. Phir jab Nabi Kareem Sallallahu Alaihi Wasallam wapas hue to wo bhi wapas hue. Qailoola ka waqt ek wadi mein aaya ‘ jahan babool ke darakht bahut thay. Chunancha Nabi Kareem Sallallahu Alaihi Wasallam wahin utar gaye aur sahaba (Radi Allahu Anhum) darakhton ke saye ke liye poori wadi mein phail gaye. Aap Sallallahu Alaihi Wasallam ne bhi ek babool ke darakht ke neeche qayam farmaya aur apni talwar is darakht par latka di. Jabir Radi Allahu Anhu ne bayan kiya ke abhi thori der humein soye hue hui thi ke Nabi Kareem Sallallahu Alaihi Wasallam ne humein pukara. Hum jab khidmat mein hazir hue to Aap ke pas ek badwi baitha hua tha. Aap Sallallahu Alaihi Wasallam ne farmaya ke is shakhs ne meri talwar (mujh hi par) khinch li thi ‘ mein is waqt soya hua tha ‘ meri aankh khuli to meri nangi talwar is ke hath mein thi. Is ne mujh se kaha ‘ tumhein mere hath se aaj kaun bachaye ga? Mein ne kaha ke Allah! Ab dekho ye baitha hua hai. Nabi Kareem Sallallahu Alaihi Wasallam ne ise phir koi saza nahi di
.

Aur Aban ne kaha ke hum se Yahya Bin Abi Kaseer ne bayan kiya ‘ in se Abu Salama ne aur in se Jabir Radi Allahu Anhu ne bayan kiya ke hum Nabi Kareem Sallallahu Alaihi Wasallam ke sath Zat-ur-Riqa mein thay. Ke hum ek ghane sayadar darakht ke pas aaye. Wo darakht hum ne Nabi Kareem Sallallahu Alaihi Wasallam ke liye makhsoos kar diya ke Aap wahan aram farmaiye. Baad mein mushrikeen mein se ek shakhs aaya ‘ Aap Sallallahu Alaihi Wasallam ki talwar darakht se latak rahi thi. Is ne wo talwar Aap Sallallahu Alaihi Wasallam par khinch li aur pucha ‘ tum mujh se darte ho? Aap Sallallahu Alaihi Wasallam ne farmaya ke nahi. Is par is ne pucha aaj mere hath se tumhein kaun bachaye ga? Aap Sallallahu Alaihi Wasallam ne farmaya ke Allah! Phir sahaba (Radi Allahu Anhum) ne ise danta dhumkaya aur namaz ki takbeer kahi gayi. To Aap Sallallahu Alaihi Wasallam ne pehle ek jamaat ko do rakat namaz-e-khauf parhayi jab wo jamaat (Aap Sallallahu Alaihi Wasallam ke peeche se) hat gayi to Aap ne dusri jamaat ko bhi do rakat namaz parhayi. Is tarah Nabi Kareem Sallallahu Alaihi Wasallam ki char rakat namaz hui. Lekin muqtadiyon ki sirf do do rakat aur Musaddad ne bayan kiya ‘ in se Abu Awana ne ‘ in se Abu Bisr ne ke is shakhs ka naam (jis ne Aap par talwar khinchi thi) Ghauras Bin Harith tha aur Nabi Kareem Sallallahu Alaihi Wasallam ne is ghazwa mein qabila Muharib Khasafa se jung ki thi
.

Aur Abu Al-Zubair ne Jabir Radi Allahu Anhu se bayan kiya ke hum Nabi Kareem Sallallahu Alaihi Wasallam ke sath maqam-e-Nakhl mein thay to Aap Sallallahu Alaihi Wasallam ne namaz-e-khauf parhayi aur Abu Huraira Radi Allahu Anhu ne bayan kiya ke mein ne Nabi Kareem Sallallahu Alaihi Wasallam ke sath namaz-e-khauf Ghazwa Najd mein parhi thi. Ye yaad rahe ke Abu Huraira Radi Allahu Anhu Nabi Kareem Sallallahu Alaihi Wasallam ki khidmat mein (sab se pehle) Ghazwa Khaibar ke mauqe par hazir hue thay
.