Hum se Qutaiba Bin Saeed ne bayan kiya, kaha hum se Yaqub ne bayan kiya, un se Abu Hazim ne aur unhon ne Sahl Bin Saad Radi Allahu Anhu se suna, un se Nabi Kareem Sallallahu Alaihi Wasallam ke (Ghazwa Uhud ke mauqe par hone wale) zakhmon ke mutaliq pucha gaya, to unhon ne bayan kiya ke Allah ki qasam! Mujhe acchi tarah yaad hai ke Rasul Allah Sallallahu Alaihi Wasallam ke zakhmon ko kis ne dhoya tha aur kaun in par pani daal raha tha aur jis dawa se Aap ka ilaj kiya gaya. Unhon ne bayan kiya ke Fatima Radi Allahu Anha Rasul Allah Sallallahu Alaihi Wasallam ki sahibzadi khoon ko dho rahi thin. Ali Radi Allahu Anhu dhaal se pani daal rahe thay. Jab Fatima Radi Allahu Anha ne dekha ke pani dalne se khoon aur zyada nikla aa raha hai to unhon ne chataiyi ka ek tukra le kar jalaya aur phir ise zakham par chipka diya jis se khoon ka aana band ho gaya. Isi din Nabi Kareem Sallallahu Alaihi Wasallam ke aage ke dandan-e-mubarak shaheed hue thay. Aap Sallallahu Alaihi Wasallam ka chehra-e-mubarak bhi zakhmi ho gaya tha aur khud sar-e-mubarak par toot gayi thi
.

Mujh se Amr Bin Ali ne bayan kiya, kaha hum se Abu Asim ne bayan kiya, kaha hum se Ibn Juraij ne bayan kiya, un se Amr Bin Dinar ne, un se Ikrima ne aur un se Abdullah Bin Abbas (Radi Allahu Anhuma) ne bayan kiya ke Allah Ta'ala ka intehayi ghazab is shakhs par nazil hua jise Allah ke nabi ne qatl kiya tha. Allah Ta'ala ka intehayi ghazab is shakhs par nazil hua jis ne (yani Abdullah Bin Qami'ah ne la'natullah alaihi) Rasul Allah Sallallahu Alaihi Wasallam ke chehra-e-mubarak ko khoon alood kiya tha
.