Mujh se Muhammad ne bayan kiya, kaha hum ko khabar di Abdah ne, unhein Hisham Bin Urwah ne, un se un ke walid ne bayan kiya ke mein ne Abdullah Bin Jafar se suna, unhon ne bayan kiya ke mein ne Ali Radi Allahu Anhu se suna, unhon ne bayan kiya ke mein ne Rasul Allah Sallallahu Alaihi Wasallam se suna aap ne farmaya (doosri sanad) aur mujh se Sadaqah ne bayan kiya, kaha hum ko Abdah ne khabar di, unhein Hisham ne un se un ke walid ne bayan kiya ke mein ne Abdullah Bin Jafar se suna unhon ne Ali Radi Allahu Anhu se ke Nabi Kareem Sallallahu Alaihi Wasallam ne farmaya " (apne zamane mein) Maryam Alaihas Salam sab se afzal aurat theen aur (is ummat mein) Khadijah (Radi Allahu Anha) sab se afzal hain. "
.

Hum se Saeed Bin Afir ne bayan kiya, kaha hum se Lais ne bayan kiya, kaha ke Hisham ne mere paas apne walid (Urwah) se likh kar bheja ke Aisha Radi Allahu Anha ne kaha Nabi Kareem Sallallahu Alaihi Wasallam ki kisi biwi ke mamla mein, mein ne itni ghairat nahi mehsoos ki jitni ghairat Khadijah Radi Allahu Anha ke mamla mein mehsoos karti thi wo mere nikah se pehle hi wafat pa chuki theen lekin Nabi Kareem Sallallahu Alaihi Wasallam ki zaban se mein un ka zikr sunti rehti thi. Aur Allah Ta'ala ne Nabi Kareem Sallallahu Alaihi Wasallam ko hukm diya tha ke unhein (jannat mein) moti ke mahal ki khushkhabri suna dein. Aap Sallallahu Alaihi Wasallam agar kabhi bakri zibah karte to un se mail mohabbat rakhne wali khawateen ko is mein se itna hadiya bhejte jo un ke liye kafi ho jata
.

Hum se Qutaibah Bin Saeed ne bayan kiya, kaha hum se Humaid Bin Abdur Rahman ne bayan kiya, un se Hisham Bin Urwah ne, un se un ke walid ne aur un se Aisha Radi Allahu Anha ne bayan kiya ke Khadijah Radi Allahu Anha ke mamla mein, mein jitni ghairat mehsoos karti thi itni kisi aurat ke mamle mein nahi kyunke Rasul Allah Sallallahu Alaihi Wasallam un ka zikr aksar kiya karte thay. Unhon ne bayan kiya ke Nabi Kareem Sallallahu Alaihi Wasallam se mera nikah un ki wafat ke teen saal baad hua tha aur Allah Ta'ala ne unhein hukm diya tha ya Jibrail Alaihis Salam ke zariya ye paigham pahunchaya tha ke Nabi Kareem Sallallahu Alaihi Wasallam unhein jannat mein motiyon ke ek mahal ki bisharat de dein
.

Mujh se Umar Bin Muhammad Bin Hasan ne bayan kiya, kaha hum se hamare walid ne bayan kiya, kaha hum se Hafs ne bayan kiya, un se Hisham ne un se un ke walid ne aur un se Aisha Radi Allahu Anha ne bayan kiya ke Rasul Allah Sallallahu Alaihi Wasallam ki tamam biwiyon mein jitni ghairat mujhe Khadijah Radi Allahu Anha se aati thi itni kisi aur se nahi aati thi halankay unhein mein ne dekha bhi nahi tha, lekin Nabi Kareem Sallallahu Alaihi Wasallam un ka zikr bakasrat farmaya karte thay aur agar koi bakri zibah karte to is ke tukre tukre kar ke Khadijah Radi Allahu Anha ki milne waliyon ko bhejte thay. Mein ne aksar Nabi Kareem Sallallahu Alaihi Wasallam se kaha jaise duniya mein Khadijah Radi Allahu Anha ke siwa koi aurat hai hi nahi! Is par Aap Sallallahu Alaihi Wasallam farmate ke wo aisi theen aur aisi theen aur un se mere aulad hai
.

Hum se Musaddad ne bayan kiya, kaha hum se Yahya ne bayan kiya, un se Ismail ne bayan kiya ke mein ne Abdullah Bin Abi Aufa se poocha Rasul Allah Sallallahu Alaihi Wasallam ne Khadijah Radi Allahu Anha ko bisharat di thi? Unhon ne farmaya ke haan, jannat mein motiyon ke ek mahal ki bisharat di thi, jahan na koi shor o ghul ho ga aur na thakan ho gi
.

Hum se Qutaibah Bin Saeed ne bayan kiya, kaha hum se Muhammad Bin Fuzail ne bayan kiya, un se Ammarah ne, un se Abu Zurah ne aur un se Abu Hurairah Radi Allahu Anhu ne bayan kiya ke Jibrail Alaihis Salam Rasul Allah Sallallahu Alaihi Wasallam ke paas aaye aur kaha ya Rasul Allah! Khadijah Radi Allahu Anha aap ke paas ek bartan liye aa rahi hain jis mein salan ya (farmaya) khana ya (farmaya) peene ki cheez hai jab wo aap ke paas aayein to un ke Rabb ki janib se unhein salam pahuncha dijiye ga aur meri taraf se bhi! Aur unhein jannat mein motiyon ke ek mahal ki bisharat de dijiye ga jahan na shor o hangama ho ga aur na takleef o thakan ho gi
.

Aur Ismail Bin Khalil ne bayan kiya, unhein Ali Bin Mushir ne khabar di, unhein Hisham ne, unhein un ke walid ne aur un se Aisha Radi Allahu Anha ne bayan kiya ke Khadijah Radi Allahu Anha ki behen Halah Bint Khuwaylid ne ek martaba Nabi Kareem Sallallahu Alaihi Wasallam se andar aane ki ijazat chahi to Aap Sallallahu Alaihi Wasallam ko Khadijah Radi Allahu Anha ki ijazat lene ki ada yaad aa gayi, Aap Sallallahu Alaihi Wasallam chaunk uthe aur farmaya " Allah! Ye to Halah hain " Aisha Radi Allahu Anha ne kaha ke mujhe is par bari ghairat aayi, mein ne kaha aap Quraish ki kis burhi ka zikr kiya karte hain jis ke masooron par bhi danton ke toot jaane ki wajah se (sirf surkhi baqi reh gayi thi) aur jise mare hue bhi ek zamana guzar chuka hai, Allah Ta'ala ne aap ko is se behtar biwi de di hai
.