Hum se Abdullah Bin Yusuf ne bayan kiya, unhon ne kaha ke mein ne Imam Malik se suna, wo Umar Bin Ubaidullah ke Maula Abu Nazr ke waste se bayan karte hain, wo Aamir Bin Saad Bin Abi Waqqas se aur un se in ke walid (Saad Bin Abi Waqqas Radi Allahu Anhu) ne bayan kiya ke mein ne Nabi Kareem Sallallahu Alaihi Wasallam se Abdullah Bin Salam Radi Allahu Anhu ke siwa aur kisi ke mutaliq ye nahi suna ke wo ahl-e-jannat mein se hain, bayan kiya ke ayat «Wa shahida shahidum mim bani Israeela» (Surah Al-Ahqaf: 10) unhein ke bare mein nazil hui thi (rawi hadees Abdullah Bin Yusuf ne) bayan kiya ke ayat ke nuzool ke mutaliq Malik ka qaul hai ya hadees mein isi tarah tha
.

Hum se Abdullah Bin Muhammad ne bayan kiya, kaha hum se Azhar Samman ne bayan kiya, un se Abu Awana ne, un se Muhammad ne aur un se Qais Bin Ubad ne bayan kiya ke mein masjid-e-Nabwi mein baitha hua tha ke ek buzurg masjid mein dakhil hue jin ke chehre par khushu o khuzu ke aasar zahir thay logon ne kaha ke ye buzurg jannati logon mein se hain, phir unhon ne do rakat namaz mukhtasar tariqa par parhi aur bahar nikal gaye mein bhi un ke peeche ho liya aur arz kiya ke jab aap masjid mein dakhil hue thay to logon ne kaha ke ye buzurg jannat walon mein se hain, is par unhon ne kaha: Allah ki qasam! Kisi ke liye aisi baat zaban se nikalna munasib nahi hai jise wo na janta ho aur mein tumhein bataoon ga ke aisa kyun hai. Nabi Kareem Sallallahu Alaihi Wasallam ke zamane mein, mein ne ek khwab dekha aur Nabi Kareem Sallallahu Alaihi Wasallam se ise bayan kiya mein ne khwab ye dekha tha ke jaise mein ek bagh mein hoon, phir unhon ne is ki wusat aur is ke sabza zaron ka zikr kiya is bagh ke darmiyan mein ek lohe ka sutoon hai jis ka nichla hissa zameen mein hai aur upar ka aasman par aur is ki choti par ek ghana darakht hai «Al-Urwah» mujh se kaha gaya ke is par charh jao mein ne kaha ke mujh mein to itni taqat nahi hai itne mein ek khadim aaya aur peeche se mere kapre is ne uthaye to mein charh gaya aur jab mein is ki choti par pahunch gaya to mein ne is ghane darakht ko pakar liya mujh se kaha gaya ke is darakht ko poori mazbooti ke sath pakar le, abhi mein ise apne hath se pakre hue tha ke meri aankh khul gayi. Ye khwab jab mein ne Nabi Kareem Sallallahu Alaihi Wasallam se bayan kiya to Aap Sallallahu Alaihi Wasallam ne farmaya ke jo bagh tum ne dekha hai, wo to Islam hai aur is mein sutoon Islam ka sutoon hai aur «Al-Urwah» (ghana darakht) «Urwat-ul-Wusqa» hai is liye tum Islam par marte dam tak qaim raho ge. Ye buzurg Abdullah Bin Salam thay aur mujh se Khalifa ne bayan kiya un se Muaz ne bayan kiya un se Ibn Aun ne bayan kiya un se Muhammad ne un se Qais Bin Ubad ne bayan kiya Abdullah Bin Salam Radi Allahu Anhu se unhon ne «Munsifun» (khadim) ke bajaye «Waseefun» ka lafz zikr kiya
.

Hum se Sulaiman Bin Harb ne bayan kiya, kaha hum se Shuba ne, un se Saeed Bin Abi Burdah ne aur un se un ke walid ne ke mein Madinah Munawwarah hazir hua to mein ne Abdullah Bin Salam Radi Allahu Anhu se mulaqat ki, unhon ne kaha, aao tumhein mein sattu aur khajoor khalaoon ga aur tum ek (ba'azmat) makan mein dakhil ho ge (ke Rasul Sallallahu Alaihi Wasallam bhi is mein tashreef le gaye thay) phir Aap Sallallahu Alaihi Wasallam ne farmaya tumhara qiyam ek aise mulk in mein hai jahan sudi mamlat bahut aam hain agar tumhara kisi shakhs par koi haqq ho aur phir wo tumhein ek tinke ya jau ke ek dane ya ek ghaas ke barabar bhi hadiya de to ise qabool na karna kyunke wo bhi sud hai. Nazr, Abu Dawood aur Wahab ne (apni riwayaton mein) «Al-Baitu» (ghar) ka zikr nahi kiya
.