Hum se Qutaibah bin Sa'id ne bayan kiya, kaha hum se Laith bin Sa'd ne bayan kiya, in se Zuhri ne, in se Urwah ne aur in se Aisha Radi Allahu Anha ne ke Quraish Makhzumiyah aurat ke maamle ki wajah se bahut ranjeeda thay. Unhon ne yeh faisla aapas mein kiya ke Usama bin Zaid Radi Allahu Anhuma ke siwa, jo Rasoolullah Sallallahu Alaihi Wa Sallam ko nihayat aziz hain (is aurat ki sifarish ke liye) aur kon jurat kar sakta hai!

(doosri sanad) aur hum se Ali ne bayan kiya, kaha hum se Sufyan ne bayan kiya, unhon ne kaha ke mein ne Zuhri se Makhzumiyah ki hadeeth poochi to woh mujh par bahut ghussa ho gaye. Mein ne is par Sufyan se poocha ke phir Aap ne kisi aur zariya se is hadeeth ki riwayat nahi ki? Unhon ne bayan kiya ke Ayub bin Musa ki likhi hui ek kitab mein, mein ne yeh hadeeth dekhi. Woh Zuhri se riwayat karte thay, woh Urwah se, woh Aisha Radi Allahu Anha se ke Bani Makhzum ki ek aurat ne chori kar li thi. Quraish ne (apni majlis mein) socha ke Nabi Kareem Sallallahu Alaihi Wa Sallam ki khidmat mein is aurat ki sifarish ke liye kon ja sakta hai? Koi is ki jurat nahi kar saka, aakhir Usama bin Zaid Radi Allahu Anhuma ne sifarish ki to Aap Sallallahu Alaihi Wa Sallam ne farmaya ke Bani Israel mein yeh dastoor ho gaya tha ke jab koi shareef aadmi chori karta to ise chhorh dete aur agar koi kamzor aadmi chori karta to is ka hath kaatte. Agar aaj Fatimah (Radi Allahu Anha) ne chori ki hoti to mein is ka bhi hath kaatta.

Mujh se Hasan bin Muhammad ne bayan kiya, unhon ne kaha hum se Abu Abbad Yahya bin Abbad ne bayan kiya, unhon ne kaha hum se Majishoon ne bayan kiya, unhein Abdullah bin Dinar ne khabar di ke Abdullah bin Umar Radi Allahu Anhuma ne ek din ek sahib ko masjid mein dekha ke apna kapra ek kone mein phaila rahe thay. Unhon ne kaha dekho yeh kon sahib hain? Kaash! Yeh mere qareeb hote. Ek shakhs ne kaha Ae Abu Abdur Rahman! Kya Aap unhein nahi pehchanate? Yeh Muhammad bin Usama Radi Allahu Anhu hain. Ibn Dinar ne bayan kiya ke yeh sunte hi Abdullah bin Umar Radi Allahu Anhuma ne apna sar jhuka liya aur apne hathon se zameen kureedne lage phir bole agar Rasoolullah Sallallahu Alaihi Wa Sallam unhein dekhte to yaqeenan Aap un se mohabbat farmate.

Hum se Musa bin Ismail ne bayan kiya, kaha hum se Mutamir ne bayan kiya, kaha ke mein ne apne baap se suna, kaha hum se Abu Usman ne bayan kiya, aur in se Usama bin Zaid Radi Allahu Anhuma ne bayan kiya ke Nabi Kareem Sallallahu Alaihi Wa Sallam unhein aur Hasan Radi Allahu Anhu ko pakar lete aur farmate: Ae Allah! Tu unhein apna mahboob bana ke mein in se mohabbat karta hun.

Aur Nuaim ne kaha in se Ibn al-Mubarak ne bayan kiya, unhein Ma'mar ne khabar di, unhein Zuhri ne, unhein Usama bin Zaid Radi Allahu Anhuma ke ek moula (Harmalah) ne khabar di ke Hajjaj bin Aiman bin Umm-e-Aiman ko Abdullah bin Umar Radi Allahu Anhuma ne dekha (namaz mein) unhon ne ruku aur sajda poori tarah nahi ada kiya, (Aiman Ibn Umm-e-Aiman, Usama Radi Allahu Anhu ki maan ki taraf se bhai thay, Aiman Radi Allahu Anhu qabeela Ansar ke ek fard thay) to Ibn Umar Radi Allahu Anhuma ne in se kaha ke (namaz) dobara parh lo.

Abu Abdullah (Imam Bukhari Rahimahullah) ne kaha ke mujh se Sulaiman bin Abdur Rahman ne bayan kiya, kaha hum se Waleed ne bayan kiya, kaha hum se Abdur Rahman bin Nimr ne bayan kiya, in se Zuhri ne, in se Usama bin Zaid Radi Allahu Anhuma ke moula Harmalah ne bayan kiya ke woh Abdullah bin Umar Radi Allahu Anhuma ki khidmat mein hazir thay ke Hajjaj bin Aiman (masjid ke) andar aaye na unhon ne ruku poori tarah ada kiya tha aur na sajda. Ibn Umar Radi Allahu Anhuma ne in se farmaya ke namaz dobara parh lo. Phir jab woh jane lage to unhon ne mujh se poocha ke yeh kon hain? Mein ne arz kiya Hajjaj bin Aiman Ibn Umm-e-Aiman hain. Is par Aap ne kaha agar unhein Rasoolullah Sallallahu Alaihi Wa Sallam dekhte to bahut aziz rakhte, phir Aap ne Nabi Kareem Sallallahu Alaihi Wa Sallam ki Usama Radi Allahu Anhu aur Umm-e-Aiman Radi Allahu Anha ki tamam aulad se mohabbat ka zikr kiya. Imam Bukhari Rahimahullah ne bayan kiya ke mujh se mere baaz asatizah ne bayan kiya aur in se Sulaiman ne ke Umm-e-Aiman Radi Allahu Anha ne Nabi Kareem Sallallahu Alaihi Wa Sallam ko goad liya tha.