Hum se Yahya Bin Bukair ne bayan kiya, kaha hum se Laith ne bayan kiya, un se Aqeel ne bayan kiya, un se Ibn Shihab ne, un se Taymiyyeen ke maula Ibn Abi Anas ne bayan kiya, un se un ke walid ne bayan kiya ke Abu Hurairah (Radi Allahu Anhu) ko ye kehte suna tha ke Rasul Allah (Sallallahu Alaihi Wasallam) ne farmaya "Jab Ramzan ka mahina aata hai to Jannat ke darwaze khol diye jate hain. Jahannum ke darwaze band kar diye jate hain aur shayatin ko zanjeeron mein kas diya jata hai."
.

Hum se Humaidi ne bayan kiya, kaha hum se Sufyan Bin Uyaina ne, kaha hum se Amr Bin Dinar ne, kaha ke mujhe Said Bin Jubair ne khabar di, kaha ke mein ne Ibn Abbas (Radi Allahu Anhuma) se pucha (Nauf Bakali kehta hai ke Khizar ke paas jo Musa gaye thay wo doosre Musa thay) to unhon ne kaha ke hum se Ubai Bin Kab ne bayan kiya, unhon ne Rasul Allah (Sallallahu Alaihi Wasallam) se suna, Aap (Sallallahu Alaihi Wasallam) farma rahe thay ke Musa Alaihis Salam ne apne rafeeq-e-safar (Yusha Bin Noon) se farmaya ke hamara khana la, is par unhon ne bataya ke aap ko maloom bhi hai jab hum ne chattan par padao dala tha to mein machhli wahin bhool gaya (aur apne sath na la saka) aur mujhe ise yaad rakhne se sirf shaitan ne ghafil rakha aur Musa Alaihis Salam ne is waqt tak koi thakan maloom nahi ki jab tak is hadd se na guzar liye, jahan ka Allah Ta'ala ne hukm diya tha
.

Hum se Abdullah Bin Muslima ne bayan kiya, un se Imam Maalik ne bayan kiya, un se Abdullah Bin Dinar ne bayan kiya aur un se Abdullah Bin Umar (Radi Allahu Anhuma) ne bayan kiya ke mein ne Rasul Allah (Sallallahu Alaihi Wasallam) ko dekha ke Aap mashriq ki taraf isharah kar ke farma rahe thay ke haan! Fitna isi taraf se nikalega jahan se shaitan ke sarr ka kona nikalta hai
.

Hum se Yahya Bin Jafar ne bayan kiya, unhon ne kaha hum se Muhammad Bin Abdullah Ansari ne bayan kiya, unhon ne kaha hum se Ibn Juraij ne bayan kiya, unhon ne kaha ke mujhe Ata Bin Abi Rabah ne khabar di aur unhein Jabir (Radi Allahu Anhu) ne khabar di ke Nabi Kareem (Sallallahu Alaihi Wasallam) ne farmaya "Raat ka andhera shuru hone par ya raat shuru hone par apne bacchon ko apne paas (ghar mein) rok lo, kyunke shayatin isi waqt phailna shuru karte hain. Phir jab isha ke waqt mein se ek ghadi guzar jaye to unhein chhod do (chalein phirein) phir Allah ka naam le kar apna darwaza band karo, Allah ka naam le kar apna chiragh bujha do, pani ke bartan Allah ka naam le kar dhak do, aur doosre bartan bhi Allah ka naam le kar dhak do (aur agar dhakkan na ho) to darmiyan mein hi koi cheez rakh do."
.

Hum se Mahmud Bin Ghaylan ne bayan kiya, kaha hum se Abdur Razzaq ne bayan kiya, kaha hum ko Ma'mar ne khabar di, unhein Zuhri ne, unhein Zain-ul-Abidin Ali Bin Husain (Radi Allahu Anhu) ne aur un se Safiyya Bint Huyay (Radi Allahu Anha) ne bayan kiya ke Rasul Allah (Sallallahu Alaihi Wasallam) itikaf mein thay to mein raat ke waqt Aap se mulaqat ke liye (masjid mein) aayi, mein Aap (Sallallahu Alaihi Wasallam) se baatein karti rahi, phir jab wapas hone ke liye khadi hui to Aap (Sallallahu Alaihi Wasallam) bhi mujhe chhod aane ke liye khade hue. Umm-ul-Momineen Sayyida Safiyya (Radi Allahu Anha) ka makan Usama Bin Zaid (Radi Allahu Anhuma) ke makan hi mein tha. Isi waqt do ansari sahaba (Usaid Bin Huzair, Ubada Bin Bashir) guzre. Jab unhon ne Aap (Sallallahu Alaihi Wasallam) ko dekha to taiz chalne lage. Aap (Sallallahu Alaihi Wasallam) ne un se farmaya, zara thehar jao ye Safiyya Bint Huyay hain. In dono sahaba ne arz kiya, Subhan Allah: Ya Rasul Allah! (Kya hum bhi Aap ke bare mein koi shubha kar sakte hain) Aap (Sallallahu Alaihi Wasallam) ne farmaya ke shaitan insan ke andar khoon ki tarah daudta rehta hai. Is liye mujhe darr laga ke kahin tumhare dilon mein bhi koi waswasa na daal de, ya Aap (Sallallahu Alaihi Wasallam) ne (lafz 'su-in' ki jagah) lafz 'shaian' farmaya, maane ek hi hain
.

Hum se Abdan ne bayan kiya, un se Abu Hamza ne, un se Aamash ne, un se Adi Bin Sabit ne aur un se Sulaiman Bin Surad (Radi Allahu Anhu) ne bayan kiya ke mein Nabi Kareem (Sallallahu Alaihi Wasallam) ki khidmat mein baitha hua tha aur (qareeb hi) do aadmi aapas mein gali galoch kar rahe thay ke ek shakhs ka munh surkh ho gaya aur gardan ki ragein phool gayeen. Aap (Sallallahu Alaihi Wasallam) ne farmaya ke mujhe ek aisa kalma maloom hai ke agar ye shakhs ise parh le to is ka ghussa jata rahega. Farmaya 'Auzu billahi minash shaitan' 'Mein panah mangta hoon Allah ki shaitan se.' To is ka ghussa jata rahega. Logon ne is par is se kaha ke Nabi Kareem (Sallallahu Alaihi Wasallam) farma rahe hain ke tumhein shaitan se Allah ki panah mangni chahiye, us ne kaha, kya mein koi deewana hoon
.

Hum se Adam Bin Abi Iyas ne bayan kiya, kaha hum se Shuba ne bayan kiya, un se Mansoor ne bayan kiya, un se Salim Bin Abi-ul-Jad ne, un se Kuraib ne aur un se Ibn Abbas (Radi Allahu Anhuma) ne bayan kiya ke Nabi Kareem (Sallallahu Alaihi Wasallam) ne farmaya "Koi shakhs jab apni biwi ke paas jaye aur ye dua parh le. 'Allahumma jannibnish shaitana, wa jannibish shaitana ma razaqtani' 'Ae Allah! Mujhe shaitan se door rakh aur jo meri aulad paida ho, ise bhi shaitan se door rakh.' Phir is suhbat se agar koi bacha paida ho to shaitan ise koi nuqsan nahi pahuncha sakega aur na is par tasallut qaim kar sakega." Shuba ne bayan kiya aur hum se Aamash ne bayan kiya, un se Salim ne, un se Kuraib ne aur un se Ibn Abbas (Radi Allahu Anhuma) ne aisi hi riwayat ki
.

Hum se Mahmud Bin Ghaylan ne bayan kiya, kaha hum se Shababa ne bayan kiya, kaha hum se Shuba ne bayan kiya, un se Muhammad Bin Ziyad ne aur un se Abu Hurairah (Radi Allahu Anhu) ne bayan kiya ke Nabi Kareem (Sallallahu Alaihi Wasallam) ne ek martaba namaz parhi aur farigh hone ke baad farmaya ke shaitan mere samne aa gaya tha aur namaz tudwane ki koshishein shuru kar di theen, lekin Allah Ta'ala ne mujhe is par ghalib kar diya. Phir hadees ko tafseel ke sath aakhir tak bayan kiya
.

Hum se Muhammad Bin Yusuf ne bayan kiya, kaha hum se Auzai ne bayan kiya, un se Yahya Bin Abi Kaseer ne, un se Abu Salama ne aur un se Abu Hurairah (Radi Allahu Anhu) ne bayan kiya ke Nabi Kareem (Sallallahu Alaihi Wasallam) ne farmaya "Jab namaz ke liye azan di jati hai to shaitan apni peeth pher kar goz marta hua bhagta hai. Jab azan khatam ho jati hai to wapas aa jata hai. Phir jab takbeer hone lagti hai to bhag khada hota hai aur jab takbeer khatam ho jati hai to phir wapas aa jata hai aur aadmi ke dil mein wasawis dalne lagta hai ke falan baat yaad kar aur falan baat yaad kar, natija ye hota hai ke is ko ye bhi yaad nahi rehta ke teen rakat namaz parhi thi ya char rakat, jab ye yaad na rahe to sahu ke do sajde kare."
.

Hum se Abu-ul-Yaman ne bayan kiya, kaha hum ko Shuaib ne khabar di, unhein Abu-ul-Zinad ne, unhein Aaraj ne aur un se Abu Hurairah (Radi Allahu Anhu) ne bayan kiya ke Nabi Kareem (Sallallahu Alaihi Wasallam) ne farmaya "Shaitan har insan ki paidayish ke waqt apni ungli se is ke pehlu mein kachoke lagata hai siwaye Isa Bin Maryam Alaihis Salam ke jab unhein wo kachoke lagane gaya to parde par laga aaya tha (jis ke andar bacha rehta hai. Is ki rasayi wahan tak na ho saki, Allah ne Isa Alaihis Salam ko is ki is harkat se mahfooz rakha)."
.