Aur Allah Ta'ala ne farmaya "wa-in yuridu ay-yakh-dauka fa-inna hasba-kallahu" " Aur agar ye kafir log Aap ko dhoka dena chahein (Ae Nabi!) to Allah Aap ke liye kafi hai." Akheer ayat tak
.

Mujh se Humaidi ne bayan kiya, kaha hum se Waleed Bin Muslim ne bayan kiya, kaha hum se Abdullah Bin Alaa Bin Zubair ne bayan kiya, unhon ne bayan kiya ke mein ne Busr Bin Ubaidullah se suna, unhon ne Abu Idrees se suna, kaha ke mein ne Auf Bin Malik (Radi Allahu Anhu) se suna, Aap ne bayan kiya ke mein Ghazwa Tabuk ke mauqa par Nabi Kareem (Sallallahu Alaihi Wasallam) ki khidmat mein hazir hua, Aap is waqt chamde ke ek khaime mein tashreef farma thay. Aap (Sallallahu Alaihi Wasallam) ne farmaya, ke Qiyamat ki che nishaniyan shumar kar lo, meri maut, phir Bait-ul-Muqaddas ki fatah, phir ek waba jo tum mein shiddat se phailegi jaise bakriyon mein taun phail jata hai. Phir mal ki kasrat is darja mein hogi ke ek shakhs so dinar bhi agar kisi ko dega to is par bhi wo naraz hoga. Phir fitna itna tabah kun aam hoga ke Arab ka koi ghar baqi na rahega jo is ki lapait mein na aa gaya hoga. Phir sulah jo tumhare aur Bani-ul-Asfar (Nasara-e-Rome) ke darmiyan hogi, lekin wo dagha kareinge aur ek azeem lashkar ke sath tum par chadhai kareinge. Is mein assi jhande honge aur har jhande ke matahat barah hazar fauj hogi (yaani nau lakh sath hazar fauj se wo tum par hamla-awar honge)
.