Imam Hasan Basri aur Ibn Sireen ne kaha ke maal-e-ghanimat mein se mazdoor ko bhi hissa diya jaye ga. Atiyyah Bin Qais ne ek ghora (maal-e-ghanimat ke hisse ke) nisf ki shart par liya. Ghore ke hisse mein (fatah ke baad maal-e-ghanimat se) char sau dinar aaye. Atiyyah ne do sau dinar khud rakh liye aur do sau ghore ke malik ko de diye
.

Hum se Abdullah Bin Muhammad ne bayan kiya, kaha hum se Sufyan ne, un se Ibn Juraij ne, un se Ata ne, un se Safwan Bin Ya'la ne aur un se un ke walid (Ya'la Bin Umayyah Radi Allahu Anhu) ne bayan kiya ke mein Rasul Allah (Sallallahu Alaihi Wasallam) se sath Ghazwah-e-Tabook mein shareek tha aur ek jawan oont mein ne sawari ke liye diya tha, mere khayal mein mera ye amal, tamam doosre aamal ke muqable mein sab se ziyada qabil-e-bharosa tha. (Ke Allah Ta'ala ke haan maqbool ho ga) mein ne ek mazdoor bhi apne sath le liya tha. Phir wo mazdoor ek shakhs (khud Ya'la Bin Umayyah Radi Allahu Anhu) se lar para aur un mein se ek ne doosre ke hath mein dant se kaat liya. Doosre ne jhat jo apna hath us ke munh se kheencha to us ke aage ka dant toot gaya. Wo shakhs Nabi Kareem (Sallallahu Alaihi Wasallam) ki khidmat mein faryadi hua lekin Aap (Sallallahu Alaihi Wasallam) ne hath kheenchne wale par koi tawan nahi farmaya balke farmaya ke kya tumhare munh mein wo apna hath yun hi rehne deta taake tum ise chaba jao jaise oont chabata hai
.