Aur Nabi Kareem (Sallallahu Alaihi Wasallam) ne farmaya "Aadmi ki wasiyat likhi hui honi chahiye." Aur Allah Ta'ala ne (Surat-ul-Baqarah) mein farmaya «Kutiba Alaikum Iza Hazara Ahadakumul Mautu In Taraka Khairan Al-Wasiyyatu Lil-Walidaini Wal-Aqrabina Bil-Ma'rufi Haqqan Alal Muttaqina * Famman Baddalahu Ba'da Ma Samiahu Fa'innama Ismuhu Alallazina Yubaddilunahu Innallaha Samiun Alimun * Famman Khafa Mim Musin Janafan Au Isman Fa'aslaha Bainahum Fala Isma Alaihi Innallaha Ghafurun Rahimun‏.» "Tum par farz kiya gaya hai ke jab tum mein se kisi ko maut aati maloom ho aur kuch maal bhi chor raha ho to wo walidain aur azeezon ke haq mein dastoor ke muwafiq wasiyat kar jaye. Ye lazim hai parhezgaron par. Phir jo koi ise us ke sunne ke baad badal dale so us ka gunah usi par hoga jo ise badle ga ' beshak Allah bara sunne wala bara janne wala hai. Albatta jis kisi ko wasiyat karne wale se mutaliq kisi ki tarafdari ya haq talfi ka ilm ho jaye phir wo mosi-lah aur warison mein (wasiyat mein kuch kami kar ke) mail kara de to us par koi gunah nahi. Beshak Allah Ta'ala bara bakhshish karne wala nihayat raham karne wala hai." (Ayat mein) «Janafan» ke maani ek taraf jhuk jaane ke hain «Mutajanif» ke maani jhukne wale ke hain
.

Hum se Abdullah Bin Yusuf ne bayan kiya ' kaha hum ko Imam Malik ne khabar di Nafi se ' wo Abdullah Bin Umar (Radi Allahu Anhuma) se ke Rasul Allah (Sallallahu Alaihi Wasallam) ne farmaya "Kisi musalman ke liye jin ke paas wasiyat ke qabil koi bhi maal ho durust nahi ke do raat bhi wasiyat ko likh kar apne paas mehfooz rakkhe baghair guzare." Imam Malik ke sath is riwayat ki mutabiat Muhammad Bin Muslim ne Amr Bin Dinar se ki hai ' unhon ne Ibn Umar (Radi Allahu Anhuma) se aur unhon ne Nabi Kareem (Sallallahu Alaihi Wasallam) se riwayat ki hai
.

Hum se Ibrahim Bin Haris ne bayan kiya ' unhon ne kaha hum se Yahya Ibn Abi Bukair ne bayan kiya ' unhon ne kaha hum se Zuhair Bin Muawiyah Jafi ne bayan kiya ' unhon ne kaha hum se Abu Ishaq Amr Bin Abdullah ne bayan kiya aur un se Rasul Allah (Sallallahu Alaihi Wasallam) ke nisbati bhai Amr Bin Haris (Radi Allahu Anhu) ne jo Juwairiyah Bint-e-Haris (Radi Allahu Anha) (Umm-ul-Momineen) ke bhai hain ' bayan kiya ke Rasul Allah (Sallallahu Alaihi Wasallam) ne apni wafat ke baad siwaye apne safaid khachir ' apne hathiyar aur apni zameen ke jise Aap (Sallallahu Alaihi Wasallam) waqf kar gaye thay na koi dirham chora tha na dinar na ghulam na bandi aur na koi cheez
.

Hum se Khallad Bin Yahya ne bayan kiya ' kaha hum se Imam Malik ne bayan kiya ' kaha hum se Talhah Bin Musarrif ne bayan kiya ' unhon ne bayan kiya ke mein ne Abdullah Bin Abi Aufa (Radi Allahu Anhu) se sawal kiya ke Rasul Allah (Sallallahu Alaihi Wasallam) ne koi wasiyat ki thi? Unhon ne kaha ke nahi. Is par mein ne poocha ke phir wasiyat kis tarah logon par farz hui? Ya (rawi ne is tarah bayan kiya) ke logon ko wasiyat ka hukm kyun kar diya gaya? Unhon ne kaha ke Aap (Sallallahu Alaihi Wasallam) ne logon ko Kitabullah par amal karne ki wasiyat ki thi (aur Kitabullah mein wasiyat karne ke liye hukm maujood hai)
.

Hum se Amr Bin Zurarah ne bayan kiya ' ke hum ko Ismail Bin Aliyyah ne khabar di Abdullah Bin Awn se ' unhein Ibrahim Nakhi ne ' un se Aswad Bin Yazid ne bayan kiya ke Aisha (Radi Allahu Anha) ke yahan kuch logon ne zikr kiya ke Ali (Radi Allahu Anhu) (Nabi Kareem Sallallahu Alaihi Wasallam ke) wasi thay to aap ne kaha ke kab unhein wasi banaya. Mein to aap ke wisal ke waqt sar-mubarak apne seene par ya unhon ne (bajaye seene ke) kaha ke apne god mein rakkhe hue thi phir Aap (Sallallahu Alaihi Wasallam) ne (pani ka) tasht mangwaya tha ke itne mein (sar-mubarak) meri god mein jhuk gaya aur mein samajh na saki ke Aap (Sallallahu Alaihi Wasallam) ki wafat ho chuki hai to Aap (Sallallahu Alaihi Wasallam) ne Ali (Radi Allahu Anhu) ko wasi kab banaya
.