Hum se Ismail ne bayan kiya, kaha hum se Imam Malik ne bayan kiya, unhon ne Hisham Bin Urwah se, un se un ke walid ne aur un se Aisha (Radi Allahu Anha) ne bayan kiya ke mere paas Barirah (Radi Allahu Anha) aayin aur kehne lagein ke mein ne apne malik se nau oqiyah chandi par mukatabat kar li hai, har saal ek oqiyah dena hoga. Aap bhi meri madad kijiye. Aisha (Radi Allahu Anha) ne farmaya ke agar tumhare malik chahein to mein ek dam unhein itni qeemat ada kar sakti hoon. Lekin tumhari wala meri hogi. Barirah (Radi Allahu Anha) apne malkon ke yahan gayi aur un se is surat ka zikr kiya lekin unhon ne wala ke liye inkar kiya. Jab wo un ke yahan se wapas huin to Rasul Allah (Sallallahu Alaihi Wasallam) bhi tashreef farma thay. Unhon ne kaha ke mein ne apne malkon ke samne ye surat rakkhi thi, lekin wo kehte thay ke wala unhein ki hogi. Nabi Kareem (Sallallahu Alaihi Wasallam) ne bhi ye baat suni aur Aisha (Radi Allahu Anha) ne Aap (Sallallahu Alaihi Wasallam) ko surat-e-haal se aagah kiya. Aap (Sallallahu Alaihi Wasallam) ne farmaya ke tu unhein khareed le aur unhein wala ki shart lagane de. Wala to usi ke sath qaim ho sakti hai jo azad kare. Chunancha Aisha (Radi Allahu Anha) ne aisa hi kiya phir Rasul Allah (Sallallahu Alaihi Wasallam) sahaba mein gaye aur Allah Ta'ala ki hamd-o-sana ke baad farmaya ke kuch logon ko kya ho gaya hai ke wo aisi shartein lagate hain jin ka koi pata (sanad, daleel) Kitabullah mein nahi hai aisi koi bhi shart jis ka pata (sanad, daleel) Kitabullah mein na ho baatil hai khwah so shartein kyun na lagali jayein. Allah ka faisla hi haq hai aur Allah ki shartein hi paidar hain aur wala to usi ko milegi jo azad karega
.