Hum se Muhammad Bin Sinan ne bayan kiya, kaha ke hum se Fulaih ne bayan kiya, un se Hilal Bin Ali ne bayan kiya, (doosri sanad) aur hum se Abdullah Bin Muhammad ne bayan kiya, unhon ne kaha ke hum se Abu Aamir ne bayan kiya, un se Fulaih ne bayan kiya, un se Hilal Bin Ali ne, un se Ata Bin Yasar ne aur un se Abu Hurairah (Radi Allahu Anhu) ne ke Nabi Kareem (Sallallahu Alaihi Wasallam) ek din bayan farma rahe thay ek dehati bhi majlis mein hazir tha ke ahl-e-Jannat mein se ek shakhs apne Rabb se kheti karne ki ijazat chahega. Allah Ta'ala us se farmaye ga kya apni maujooda halat par to razi nahi hai ? Wo kahe ga kyun nahi! lekin mera ji kheti karne ko chahta hai. Nabi Kareem (Sallallahu Alaihi Wasallam) ne farmaya ke phir us ne beej dala. Palak jhapkne mein wo ug bhi aya. Pak bhi gaya aur kaat bhi liya gaya. Aur is ke dane paharon ki tarah hue. Ab Allah Ta'ala farmata hai, ay Ibn Adam! ise rakh lay, tujhe koi cheez aasooda nahi kar sakti. Ye sun kar dehati ne kaha ke qasam Allah ki wo to koi Quraishi ya Ansari hi hoga. Kyunke yahi log kheti karne wale hain. Hum to kheti hi nahi karte. Is baat par Rasul Allah (Sallallahu Alaihi Wasallam) ko hansi aa gayi
.