Hum se Yahya Bin Bukair ne bayan kiya, kaha ke hum se Yaqub Bin Abdur Rahman ne bayan kiya, un se Abu Hazim ne kaha ke mein ne Sahl Bin Saad (Radi Allahu Anhu) se suna, unhon ne kaha ke ek aurat ”burda“ le kar aayi. Sahl (Radi Allahu Anhu) ne poocha, tumhein maloom bhi hai ke ”burda“ kise kehte hain. Kaha gaya ji han! burda, hashiya daar chadar ko kehte hain. To is aurat ne kaha, ya Rasul Allah! mein ne khas Aap ko pehnane ke liye ye chadar apne hath se bani hai, Aap (Sallallahu Alaihi Wasallam) ne usay le liya. Aap (Sallallahu Alaihi Wasallam) ko is ki zaroorat bhi thi. Phir Aap (Sallallahu Alaihi Wasallam) bahar tashreef laye to Aap (Sallallahu Alaihi Wasallam) isi chadar ko bator izaar ke pehne hue thay, hazireen mein se ek sahab bole, ya Rasul Allah! ye to mujhe de dijiye, Aap (Sallallahu Alaihi Wasallam) ne farmaya ke accha le lena. Is ke baad Aap (Sallallahu Alaihi Wasallam) majlis mein thori dair tak baithe rahe phir wapas tashreef le gaye phir izaar ko teh kar ke in sahab ke paas bhijwa diya. Logon ne kaha tum ne Nabi Kareem (Sallallahu Alaihi Wasallam) se ye izaar mang kar accha nahi kiya kyunke tumhein maloom hai ke Aap (Sallallahu Alaihi Wasallam) kisi sa'il ke sawal ko radd nahi kiya karte hain. Is par in sahabi ne kaha ke wallah! mein ne to sirf is liye ye chadar mangi hai ke jab mein maroon to ye mera kafan bane. Sahl (Radi Allahu Anhu) ne farmaya ke wo chadar hi un ka kafan bani
.