Hum se Muhammad Bin Musanna ne bayan kiya, kaha ke hum se Yahya Bin Qattan ne bayan kiya, un se Hisham Bin Urwah ne bayan kiya, kaha ke mujhe mere walid Urwah ne khabar di kaha ke mujhe Aisha (Radi Allahu Anha) ne khabar di unhon ne kaha ke Zi Al-Hijjah ka chand nikalne wala tha ke hum Rasul Allah (Sallallahu Alaihi Wasallam) ke sath Madinah se Haj ke liye chale Nabi Kareem (Sallallahu Alaihi Wasallam) ne farmaya ke jo Umrah ka ihram bandhna chahe wo Umrah ka bandh le aur jo Haj ka bandhna chahe wo Haj ka bandh le, agar mein apne sath qurbani na lata to mein bhi Umrah ka hi ihram bandhta, chunancha bohat se logon ne Umrah ka ihram bandha aur bohton ne Haj ka. Mein bhi in logon mein thi jinhon ne Umrah ka ihram bandha tha. Magar mein Makkah mein dakhil hone se pehle haiza ho gayi, Arafa ka din aa gaya aur abhi mein haiza hi thi, is ka rona mein Rasul Allah (Sallallahu Alaihi Wasallam) ke samne royi, Aap (Sallallahu Alaihi Wasallam) ne farmaya ke Umrah chhor de aur sar khol le aur kangha kar le phir Haj ka ihram bandh lena, chunancha mein ne aisa hi kiya, is ke baad jab Muhassab ki raat aayi to Nabi Kareem (Sallallahu Alaihi Wasallam) ne mere sath Abdul Rahman ko Taneem bheja wo mujhe apni sawari par peeche bitha kar le gaye wahan se Aisha (Radi Allahu Anha) ne apne (chhore hue) umray ke bajaye doosre Umrah ka ihram bandha is tarah Allah Ta'ala ne un ka bhi Haj aur Umrah dono hi poore kar diye na to is ke liye unhein qurbani lani pari na sadqa dena para aur na roza rakhna para
.