Hum se Musaddad bin Musarhad Basri ne byaan kiya , unhon ne kaha hum se Yahya Qattan ne byaan kiya , un se Ubaidullah Umari ne , un se Nafi ne aur un se Abdullah bin Umar razi Allahu anhuma ne ke Rasool Allah salla Allahu alaihi wasallam «ath-thaniyyatal-ulya» yani maqam-e-Kada ki taraf se dakhil hote jo Batha mein hai aur «ath-thaniyyatas-sufla» ki taraf se nikalte thay yani neeche wali ghati ki taraf se . Imam Bukhari rahmahu Allah ne kaha Musaddad ism-e-ba-musamma thay yani Musaddad ke maani Arabi zaban mein mazboot aur durust ke hain to hadees ki riwayat mein mazboot aur durust thay aur maine Yahya bin Mu'een se suna woh kehte hain maine Yahya Qattan se suna , woh kehte thay agar main Musaddad ke ghar ja kar in ko hadees sunaya karta to woh is ke laiq thay aur meri kitabein hadees ki mere paas rahein ya Musaddad ke paas mujhe kuch parwah nahi . Goya Yahya Qattan ne Musaddad ki be-had tareef ki .

Hum se Humaidi aur Muhammad bin Musanna ne byaan kiya , unhon ne kaha ke hum se Sufyan bin Uyaynah ne byaan kiya , un se Hisham bin Urwah ne , un se in ke walid ne , un se Aisha razi Allahu anha ne ke jab Rasool Allah salla Allahu alaihi wasallam Makka mein tashreef laye to oopar ki buland jaanib se shehar ke andar dakhil hue aur (Makka se) wapas jab gaye to neeche ki taraf se nikal gaye .

Hum se Mahmood bin Ghailan Marwazi ne byaan kiya , unhon ne kaha ke hum se Abu Usama ne byaan kiya , unhon ne kaha ke hum se Hisham bin Urwah ne byaan kiya . Un se in ke walid Urwah bin Zubayr ne aur un se Aisha razi Allahu anha ne ke Nabi Karim salla Allahu alaihi wasallam fatah Makka ke mauqe par shehar mein Kada ki taraf se dakhil hue aur Kuda ki taraf se nikle jo Makka ke buland jaanib hai .

Hum se Ahmad bin Isa ne byaan kiya , kaha ke hum se Abdullah ibn Wahab ne byaan kiya , kaha ke humein Amru bin Harith ne khabar di aur unhein Hisham bin Urwah ne , unhein in ke walid Urwah bin Zubayr ne aur unhein Aisha razi Allahu anha ne ke Nabi Karim salla Allahu alaihi wasallam fatah Makka mauqe par dakhil hote waqt Makka ke balayi ilaqa Kada se dakhil hue . Hisham ne byaan kiya ke Urwah agarchay Kada aur Kuda dono taraf se dakhil hote thay lekin aksar Kuda se dakhil hote kyunke yeh rasta in ke ghar se qareeb tha .

Hum se Abdullah bin Abdul Wahab ne byaan kiya , unhon ne kaha ke hum se Hatim bin Ismail ne Hisham se byaan kiya , un se Urwah ne byaan kiya ke Nabi Karim salla Allahu alaihi wasallam fatah Makka ke mauqe par Makka ke balayi ilaqa Kada ki taraf se dakhil hue thay . Lekin Urwah aksar Kuda ki taraf se dakhil hote thay kyunke yeh rasta in ke ghar se qareeb tha .

Hum se Musa bin Ismail ne byaan kiya , kaha ke hum se Wuhaib bin Khalid ne byaan kiya kaha ke hum se Hisham ne apne baap se byaan kiya , unhon ne byaan kiya ke Nabi Karim salla Allahu alaihi wasallam fatah Makka ke mauqe par Kada se dakhil hue thay . Urwah khud agarchay dono taraf se (Kada aur Kuda) dakhil hote lekin aksar Aap Kuda ki taraf se dakhil hote thay kyunke yeh rasta in ke ghar se qareeb tha . Abu Abdullah (Imam Bukhari rahmatullah alaihi) ne kaha ke Kada aur Kuda do maqamaat ke naam hain .