Hum se Abdullah bin Yusuf Tanisi ne byaan kiya , unhon ne kaha ke hamein Imam Malik rahmahu Allah ne Nafi se khabar di , un se Abdullah bin Umar razi Allahu anhuma ne byaan kiya ke Rasool Allah salla Allahu alaihi wasallam Zohar se pehle do rakat , is ke baad do rakat aur Maghrib ke baad do rakat apne ghar mein parhte aur Isha ke baad do rakatein parhte aur Juma ke baad do rakatein jab ghar wapas hote tab parha karte thay .

Hum se Yahya bin Bukayr ne byaan kiya , unhon ne kaha ke hum se Layth ne Aqeel se byaan kiya , Aqeel se Ibn Shihab ne , unhon ne kaha ke mujhe Salim ne khabar di aur unhein Abdullah bin Umar razi Allahu anhuma ne , Aap ne batlaya ke mein ne Rasool Allah salla Allahu alaihi wasallam ke saath Zohar se pehle do rakat sunnat parhi aur Zohar ke baad do rakat aur Juma ke baad do rakat aur Maghrib ke baad do rakat aur Isha ke baad bhi do rakat (namaaz sunnat) parhi hai .

Hum se Bayan bin Amr ne byaan kiya , unhon ne kaha ke hum se Yahya bin Saeed Qattan ne byaan kiya , unhon ne kaha ke hum se Ibn Jurayj ne byaan kiya , un se Ata ne byaan kiya , un se Ubayd bin Umair ne , un se Aisha razi Allahu anha ne byaan kiya ke Nabi Karim salla Allahu alaihi wasallam kisi nafl namaaz ki Fajr ki do rakaton se zyada pabandi nahin karte thay .

Hum se Musaddad bin Musarhad ne byaan kiya , unhon ne kaha ke hum se Yahya bin Saeed Qattan ne byaan kiya , un se Ubaydullah Umari ne byaan kiya , unhon ne kaha ke mujhe Nafi ne Abdullah bin Umar razi Allahu anhuma se khabar di , unhon ne kaha ke mein ne Nabi Karim salla Allahu alaihi wasallam ke saath Zohar se pehle do rakat sunnat , Zohar ke baad do rakat sunnat , Maghrib ke baad do rakat sunnat , Isha ke baad do rakat sunnat aur Juma ke baad do rakat sunnat parhi hain aur Maghrib aur Isha ki sunnatein Aap ghar mein parhte thay . Abuz Zanad ne Musa bin Uqbah ke wasta se byaan kiya aur un se Nafi ne ke Isha ke baad apne ghar mein (sunnat parhte thay) un ki riwayat ki mutaba'at Kaseer bin Farqad aur Ayub ne Nafi ke wasta se ki hai .

Un se (Ibn Umar razi Allahu anhuma ne byaan kiya ke) meri behen Hafsa razi Allahu anha ne mujh se byaan kiya ke Nabi Karim salla Allahu alaihi wasallam Fajr hone ke baad do halki rakatain (sunnat Fajr) parhte aur yeh aisa waqt hota ke mein Nabi Karim salla Allahu alaihi wasallam ke paas nahin jaati thi . Ubaydullah ke saath is hadees ko Kaseer bin Farqad aur Ayub ne bhi Nafi se riwayat kiya aur Ibn Abi al-Zanad ne is hadees ko Musa bin Uqbah se , unhon ne Nafi se riwayat kiya . Is mein «fi baytihi» ke badal «fi ahlihi» hai .

Hum se Sulayman bin Harb ne byaan kiya , unhon ne kaha ke hum se Hammad bin Zayd ne byaan kiya , un se Ayub Sakhtiyani ne byaan kiya , un se Nafi ne , un se Abdullah bin Umar razi Allahu anhuma ne kaha ke mujhe Nabi Karim salla Allahu alaihi wasallam se das rakat sunnatein yaad hain . Do rakat sunnat Zohar se pehle , do rakat sunnat Zohar ke baad , do rakat sunnat Maghrib ke baad apne ghar mein , do rakat sunnat Isha ke baad apne ghar mein aur do rakat sunnat subah ki namaaz se pehle aur yeh woh waqt hota tha jab Aap salla Allahu alaihi wasallam ke paas koi nahin jata tha .

Mujh ko Umm al-Mumineen Hafsa razi Allahu anha ne batlaya ke muazzin jab azaan deta aur Fajr ho jaati to Aap salla Allahu alaihi wasallam do rakatain parhte .