Imam Bukhari rahimahullah ne farmaya aur Ammar aur Abu Zar aur Yunus razi Allahu anhum sahabiyon se byaan kiya , aur Jabir bin Zayd , Ikrimah aur Zuhri rahimahullah alaihim tabiyon se aisa hi manqool hai aur Yahya bin Saeed Ansari (tabi) ne kaha ke mein ne apne mulk (Madina Tayyaba) ke aalimon ko yehi dekha ke woh nawafil mein (din ko) har do rakat ke baad salam phera karte thay .

Hum se Qutaybah ne byaan kiya , kaha ke hum se Abdur Rahman bin Abil Muwal ne byaan kiya , un se Muhammad bin Munkadir ne aur un se Jabir bin Abdullah razi Allahu anhuma ne byaan kiya ke Rasool Allah salla Allahu alaihi wasallam humein apne tamam muamalat mein istikhara karne ki isi tarah taleem dete thay jis tarah Quran ki koi surat sikhlate . Aap salla Allahu alaihi wasallam farmate ke jab koi aham muamala tumhare saamne ho to farz ke alawa do rakat nafl parhne ke baad yeh dua parhe «allahumma inni astakhiruka bi'ilmika wa astaqdiruka biqudratika , wa asaluka min fadlikal azeem , fainnaka taqdiru wala aqdiru wa talamu wala alamu wa anta allamul ghuyoob , allahumma in kunta talamu anna hazal amra khayrun li fi deeni wa ma'ashi wa aqibati amri (aw qala) ajili amri wa ajilihi faqdirhu li wa yassirhu li thumma barik li feehi , wa in kunta talamu anna hazal amra sharrun li fi deeni wa ma'ashi wa aqibati amri aw qala fi ajili amri wa ajilihi fasrifhu anni wasrifni anhu , waqdir liyal khayr» (tarjuma) ”Ae mere Allah! main tujh se tere ilm ki badolat khayr talab karta hoon aur teri qudrat ki badolat tujh se taqat mangta hoon aur tere fazl-e-azeem ka talabgar hoon ke qudrat tu hi rakhta hai aur mujhe koi qudrat nahin . Ilm tujh hi ko hai aur main kuch nahin jaanta aur tu tamam posheeda baaton ko janne wala hai . Ae mere Allah! agar tu jaanta hai ke yeh kaam jis ke liye istikhara kiya ja raha hai mere deen dunya aur mere kaam ke anjam ke itibar se mere liye behtar hai ya (Aap ne yeh farmaya ke) mere liye waqti taur par aur anjam ke itibar se yeh (khayr hai) to ise mere liye naseeb kar aur is ka husool mere liye aasan kar aur phir is mein mujhe barkat ata kar aur agar tu jaanta hai ke yeh kaam mere deen , dunya aur mere kaam ke anjam ke itibar se bura hai . Ya (Aap salla Allahu alaihi wasallam ne yeh kaha ke) mere muamale mein waqti taur par aur anjam ke itibar se (bura hai) to ise mujh se hata de aur mujhe bhi is se hata de . Phir mere liye khayr muqaddar farma de , jahan bhi woh ho aur is se mere dil ko mutmain bhi kar de“ . Aap salla Allahu alaihi wasallam ne farmaya ke is kaam ki jagah is kaam ka naam le .

Hum se Makki bin Ibrahim ne byaan kiya , un se Abdullah bin Saeed ne , un se Aamir bin Abdullah bin Zubayr ne byaan kiya , unhon ne Amr bin Sulaym Zarqi se , unhon ne Abu Qatadah bin Rabee Ansari sahabi razi Allahu anhu se , unhon ne kaha ke Nabi Karim salla Allahu alaihi wasallam ne farmaya jab koi tum mein se masjid mein aaye to na baithe jab tak do rakat (Tahiyatul Masjid ki) na parh le .

Hum se Abdullah bin Yusuf Tanisi ne byaan kiya , kaha ke humein Imam Malik ne khabar di , unhein Ishaq bin Abdullah bin Abi Talhah ne aur unhein Anas bin Malik razi Allahu anhu ne ke humein Rasool Allah salla Allahu alaihi wasallam ne (hamare ghar mein jab dawat mein aaye thay) do rakat namaaz parhayi aur phir wapas tashreef le gaye .

Hum se Yahya bin Bukayr ne byaan kiya , unhon ne kaha ke hum se Layth ne Aqeel se byaan kiya , Aqeel se Ibn Shihab ne , unhon ne kaha ke mujhe Salim ne khabar di aur unhein Abdullah bin Umar razi Allahu anhuma ne , Aap ne batlaya ke mein ne Rasool Allah salla Allahu alaihi wasallam ke saath Zohar se pehle do rakat sunnat parhi aur Zohar ke baad do rakat aur Juma ke baad do rakat aur Maghrib ke baad do rakat aur Isha ke baad bhi do rakat (namaaz sunnat) parhi hai .

Hum se Adam bin Abi Iyas ne byaan kiya , kaha ke humein Shubah ne khabar di , unhein Amr bin Dinar ne khabar di , kaha ke mein ne Jabir bin Abdullah Ansari razi Allahu anhuma se suna ke Rasool Allah salla Allahu alaihi wasallam ne Juma ka khutbah dete huay farmaya ke jo shakhs bhi (masjid mein) aaye aur Imam khutbah de raha ho ya khutbah ke liye nikal chuka ho to woh do rakat namaaz (Tahiyatul Masjid ki) parh le .

Hum se Abu Naeem ne byaan kiya , kaha ke hum se Sayf bin Sulayman ne byaan kiya ke mein ne Mujahid se suna , unhon ne farmaya ke Abdullah bin Umar razi Allahu anhuma (Makkah Sharif mein) apne ghar aaye . Kisi ne kaha baithe kya ho Nabi Karim salla Allahu alaihi wasallam yeh aa gaye balkay Kaba ke andar bhi tashreef le ja chukay hain . Abdullah ne kaha yeh sun kar mein aaya . Dekha to Nabi Karim salla Allahu alaihi wasallam Kaba se bahar nikal chukay hain aur Bilal razi Allahu anhu darwaze par kharay hain . Main ne un se poocha ke ae Bilal! Rasool Allah salla Allahu alaihi wasallam ne Kaba mein namaaz parhi ? Unhon ne kaha ke han parhi thi . Main ne poocha ke kahan parhi thi ? Unhon ne bataya ke yahan in do sutoonon ke darmiyan . Phir Aap bahar tashreef laaye aur do rakatain Kaba ke darwaze ke saamne parhein aur Abu Hurairah razi Allahu anhu ne kaha ke mujhe Nabi Karim salla Allahu alaihi wasallam ne chasht ki do rakaton ki wasiyat ki thi aur Utban ne farmaya ke Rasool Allah salla Allahu alaihi wasallam aur Abu Bakr aur Umar razi Allahu anhuma subah din charhay mere ghar tashreef laaye . Hum ne Aap salla Allahu alaihi wasallam ke peeche saff bana li aur Nabi Karim salla Allahu alaihi wasallam ne do rakat namaaz parhayi .