Hum se Abdullah bin Yusuf Taneesi ne byaan kiya , unhon ne kaha ke hamein Imam Malik ne khabar di unhon ne Ibn Shihab se , unhon ne Saeed bin Musayyab aur Abu Salamah bin Abdur Rahman ke wastay se , unhon ne Abu Hurayrah razi Allahu anhu se khabar di ke Rasool Allah salla Allahu alaihi wasallam ne farmaya ke jab imam «Ameen» kahe to tum bhi «Ameen» kaho . Kyunke jis ki «Ameen» malaika ke Ameen ke saath ho gayi us ke pichhle tamam gunah maaf kar diye jayen ge . Ibn Shihab ne byaan kiya ke Rasool Allah salla Allahu alaihi wasallam «Ameen» kehtay thay .

Hum se Abdullah bin Yusuf Taneesi ne byaan kiya , unhon ne kaha ke hamein Imam Malik ne Abuz Zinad se khabar di , unhon ne Araj se , unhon ne Abu Hurayrah razi Allahu anhu se ke Rasool Allah salla Allahu alaihi wasallam ne farmaya ke jab koi tum mein se «Ameen» kahe aur farishton ne bhi usi waqt aasman par «Ameen» kahi . Is tarah ek ki «Ameen» doosre ke «Ameen» ke saath mil gayi to us ke pichhle tamam gunah maaf ho jate hain .

Hum se Abdullah bin Yusuf Taneesi ne byaan kiya , unhon ne kaha ke hamein Imam Malik ne Sami se khabar di , unhon ne Abu Saleh Zakwan ke wastay se byaan kiya , unhon ne Abu Hurayrah razi Allahu anhu se ke Nabi Karim salla Allahu alaihi wasallam ne farmaya ke jab imam «sami Allahu liman hamidah» kahe to tum «Allahumma rabbana wa lakal hamd» kaho . Kyunke jis ka yeh kehna farishton ke kehne ke saath ho ga , us ke pichhle tamam gunah bakhsh diye jayen ge.

Hum se Ahmad Bin Yunus ne bayan kiya, un se Zuhair ne bayan kiya, unhon ne kaha un se Yahya Bin Saeed ne bayan kiya, kaha ke mujhe Abu Bakr Bin Muhammad Bin Amr Bin Hazm ne khabar di. Unhein Umar Bin Abdul Aziz ne khabar di, unhein Abu Bakr Bin Abdur Rahman Bin Haris Bin Hisham ne khabar di, unhon ne Abu Hurairah (Radi Allahu Anhu) se suna, Aap bayan karte thay ke Rasul Allah (Sallallahu Alaihi Wasallam) ne farmaya ya ye bayan kiya ke mein ne Rasul Allah (Sallallahu Alaihi Wasallam) ko ye farmate hue suna, jo shakhs ho baho apna maal kisi shakhs ke paas pa lay jab ke wo shakhs deewaliyah qarar diya ja chuka ho to sahab-e-maal hi is ka doosron ke muqable mein ziyada mustahiq hai
.

Hum se Ismail Bin Idrees ne bayan kiya, unhon ne kaha ke mujh se Imam Malik ne bayan kiya, un se Sumay ne bayan kiya, un se Abu Salih ne bayan kiya aur un se Abu Hurairah (Radi Allahu Anhu) ne bayan kiya ke Rasul Allah (Sallallahu Alaihi Wasallam) ne farmaya "Jab (namaz mein) Imam kahe ke 'samiallahu liman hamidah' to tum kaha karo 'Allahumma rabbana lakal hamd' kyunke jis ka zikr Malaika ke sath muwafiq ho jata hai us ke peechhle gunah maaf ho jate hain."
.

Hum se Ali bin Abdullah ne bayan kiya, kaha hum se Sufyan ne bayan kiya ke Zuhri ne bayan kiya ke hamase Saeed bin al-Musayyab ne bayan kiya aur in se Abu Hurairah razi Allahu anhu ne ke Nabi Karim salla Allahu alaihi wasallam ne farmaya ”jab parhne wala aameen kahe to tum bhi aameen kaho kyunke is waqt mala-ika bhi aameen kehte hain aur jis ki aameen mala-ika ki aameen ke saath hoti hai is ke pichhle gunah maaf kar diye jaate hain.“