Hum se Muhammad bin Alaa ne bayan kiya , in se Ibn Fuzhail ne bayan kiya , in se Ammarah ne , in se Abu Zurah ne aur unhon ne Abu Hurairah razi Allahu anhuse suna , unhon ne bayan kiya ke main ne Nabi Karim salla Allahu alaihi wasallam se suna , Aap salla Allahu alaihi wasallam ne farmaya ke Allah Az-za wa Jal farmata hai ke is shakhs se barh kar hadd se tajawuz karne wala aur kaun hai jo meri makhlooq ki tarah makhlooq banata hai , zhara woh chane ka dana paida kar ke to dekhein ya gehoon ka ek dana ya jau ka ek dana paida kar ke to dekhein .

Hum se Musa ne bayan kiya, kaha ke hum se Abd-ul-Wahid ne, kaha hum se Ammarah ne, kaha hum se Abu Zurah ne, kaha ke main Abu Hurairah razi Allahu anhu ke saath Madinah Munawwarah mein (Marwan bin Hakam ke ghar mein) gaya to unhon ne chhat par ek musawwir ko dekha jo tasveer bana raha tha, unhon ne kaha ke main ne Rasool Allah salla Allahu alaihi wasallam se suna hai, Nabi Karim salla Allahu alaihi wasallam ne farmaya ke (Allah Ta'ala irshad farmata hai) is shakhs se barh kar zhahlim kaun ho ga jo meri makhlooq ki tarah paida karne chala hai agar usay yahi ghumand hai to usay chahiye ke ek dana paida kare, ek chyoonti paida kare. Phir unhon ne pani ka ek tasht mangwaya aur apne hath is mein dhoye. Jab baghal dhone lage to main ne arz kiya Abu Hurairah! Kya (baghal tak dhone ke baare mein) tum ne Rasool Allah salla Allahu alaihi wasallam se kuch suna hai unhon ne kaha main ne jahan tak zewar pehna ja sakta hai wahan tak dhoya hai.