Hum se Fadl bin Yaqub ne bayan kiya , unhon ne kaha hum se Abdullah bin Jafar al-Raq-qi ne bayan kiya , in se Mutamir bin Sulayman ne bayan kiya , in se Saeed bin Ubaidullah Saqafi ne bayan kiya , in se Bakr bin Abdullah Muzni aur Ziyad bin Jubayr bin Hayyah ne bayan kiya , in se Mugheera bin Shubah razi Allahu anhune (Iran ki fauj ke samne) kaha ke hamare Nabi salla Allahu alaihi wasallam ne hamain apne Rabb ke paighamaat mein se yeh paigham pahunchaya ke ham mein se jo (fi sabilillaah) qatl kiya jaye ga woh jannat mein jaye ga .

Hum se Fazl Bin Yaqub ne bayan kiya, kaha hum se Abdullah Bin Jafar Al-Raqqi ne, kaha hum se Mutamir Bin Sulaiman ne, kaha hum se Said Bin Ubaidullah Saqafi ne bayan kiya, un se Bakr Bin Abdullah Muzni aur Ziyad Bin Jubair har do ne bayan kiya aur un se Jubair Bin Hayya ne bayan kiya ke kuffar se jung ke liye Umar (Radi Allahu Anhu) ne faujon ko (Faris ke) bade bade sheharon ki taraf bheja tha. (Jab lashkar Qadsiya pahuncha aur ladai ka natija Musalmanon ke haq mein nikla) to Hormuzan (Shustar ka hakim) Islam le aaya. Umar (Radi Allahu Anhu) ne is se farmaya ke mein tum se in (mamalik-e-Faris waghera) par fauj bhejne ke silsile mein mashwara chahta hoon (ke pehle in teen maqamon Faris, Isfahan aur Azerbaijan mein kahan se ladai shuru ki jaye) us ne kaha ji haan! Is mulk ki misal aur is mein rehne wale Islam dushman bashindon ki misal ek parinde jaisi hai jis ka sarr hai, do bazu hain. Agar is ka ek bazu tod diya jaye to wo apne dono paon par ek bazu aur ek sarr ke sath khada reh sakta hai. Agar doosra bazu bhi tod diya jaye to dono paon aur sarr ke sath khada reh sakta hai. Lekin agar sarr tod diya jaye to dono paon dono bazu aur sarr sab be-kar reh jata hai. Pas sarr to Kisra hai, ek bazu Qaisar hai aur doosra Faris! Is liye aap Musalmanon ko hukm de dein ke pehle wo Kisra par hamla karein. Aur Bakr Bin Abdullah aur Ziyad Bin Jubair dono ne bayan kiya ke un se Jubair Bin Hayya ne bayan kiya ke humein Umar (Radi Allahu Anhu) ne (Jihad ke liye) bulaya aur Numan Bin Muqarrin (Radi Allahu Anhu) ko hamara ameer muqarrar kiya. Jab hum dushman ki sarr zameen (Nahawand) ke qareeb pahunche to Kisra ka ek afsar chalis hazar ka lashkar sath liye hue hamare muqabala ke liye badha. Phir ek tarjuman ne aa kar kaha ke tum mein se koi ek shakhs (muamlat par) guftagu kare. Mugheera Bin Shuba (Radi Allahu Anhu) ne (Musalmanon ki numayindagi ki aur) farmaya ke jo tumhare mutalbat hon, unhein bayan karo. Us ne pucha aakhir tum log ho kaun? Mugheera (Radi Allahu Anhu) ne kaha ke hum Arab ke rehne wale hain, hum intihayi bad-bakhtiyon aur musibaton mein mubtala thay. Bhook ki shiddat mein hum chamde, aur guthliyan choosa karte thay. Oon aur baal hamari poshaki thi. Aur pattharon aur darakhton ki hum ibadat kiya karte thay. Hamari musibatain isi tarah qaim theen ke aasman aur zameen ke Rabb ne, jis ka zikr apni tamam azmat-o-jalal ke sath buland hai. Hamari taraf hamari hi tarah (ke insani aadat-o-khasais rakhne wala) ek Nabi bheja. Hum is ke baap aur maan ko jante hain. Allah ke Rasul (Sallallahu Alaihi Wasallam) ne humein hukm diya ke hum tum se is waqt tak jung karte rahein. Jab tak tum sirf Allah akele ki ibadat na karne lago. Ya phir Islam na qabool karne ki surat mein jizya dena qabool kar lo aur hamare Nabi (Sallallahu Alaihi Wasallam) ne humein apne Rabb ka ye paigham bhi pahunchaya hai ke (Islam ke liye ladte hue) Jihad mein hamara jo aadmi bhi qatl kiya jaye ga wo aisi Jannat mein jaye ga, jo us ne kabhi nahi dekhi aur jo log hum mein se zinda baqi reh jayenge wo (fatah hasil kar ke) tum par hakim ban sakeinge (Mugheera Radi Allahu Anhu ne ye guftagu tamam kar ke Numan Radi Allahu Anhu se kaha ladai shuru karo)
.